Proposta OJE 2021 billaun $1.895 ba ona PN

DILI (TOP) — Governu liuhusi Ministériu Finansa (MF) aprezenta ona proposta-lei Orsamentu Jerál Estadu (OJE) ba tinan fiskal 2021 ba Parlamentu Nasionál (PN).

Proposta OJE 2021 ne'e, hamutuk biliaun $1.895 kompostu hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Dokumentasaun orsamentál sira-ne’ebé governu aprezenta ba Parlamentu Nasionál mak hanesan livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).

Iha aprezentasaun proposta-lei OJE 2021 ne’e aprezenta hosi Ministra Finansa Ein-Ezersísiu atuál Vise-Ministra Finansa, Sara Lobo Brites no akompaña husi Ministru Asuntu Parlamentár no Komunikasaun Sosiál, Francisco Jerónimo.

Iha momentu ne’e, Prezidente Parlamentu Nasionál, Deputadu Aniceto Longuinhos Guterres Lopes, apresia governu nia esforsu tanba aprezentasaun propotsa-lei orsamentu tuir lei haruka.

“Iha oras 15.00, data dia 15 outubru ne’e governu kumpri duni prazu aprezentasaun proposta-lei Orsamentu Jerál Estadu. Prosesu tuir mai kabe ba kompeténsia parlamentu nian atu hala’o prosesu orsamentál iha Parlamentu Nasionál”, Aniceto Guterres informa liuhosi Konferénsia Imprensa hafoin simu proposta-lei ne’e, iha Parlamentu Nasionál, Kinta 15 Outubru 2020.

Deputadu Aniceto Guterres fó-sai katak meza prezidénsia sei halo leitura ba númeru proposta-lei ne’e no asesór legál sira sei prepara nota téknika hafoin baixa ba Komisaun C (Finansa Públika) no komisaun espesializada permanente sira seluk atu aprova relatóriu no paresér.

“Posivelmente segunda-feira, lae tersa-feira atu baixa ba Komisaun C, aban sei fó tempu ba tékniku sira atu prepara nota téknika”, katak nia.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE