Lugu Ezonera Diretór Interinu Saúde RAEOA

Oekusipost.com Numbei – Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres (Lugu) desidi hodi ezonera ona diretór interinu saúde, Marcos Seo hafoin hetan xamada dala lima (5) tutuir malu, maibé la kumpre.

Desijaun ezonerasaun ne’e, Lugu desidi hodi nomeia fali eis diretór sentru saúde postu Oe-Silo, Luis de Jesus Neno mak troka fali Marcos Seo nia fatin.

Antes ne’e iha loron 10 Abril liuba, mosu dezintendimentu entre Agustinho Caet ho Marcos Seo kona-bá desijaun ba kompañia sira atu tein hodi fornese hahan ba sidadaun sira ne’ebé kumpre hela loron 14 iha sentru akollimentu sira iha Oe-Kusi Ambeno.

Husi parte Caet argumenta, to’o oras ne’e autoridade seidauk selebra kontratu ho empreza ruma atu fornese ai-han, maibé diretór interinu Seo katak, empreza Nidel__a ne’ebé iha loron hirak liuba fornese ai-han iha baze legal hela hodi tein atu fó han Ambeno nia oan sira iha Sentru Akollimentu sira, maibé Caet konsidera empreza Nidela seidauk iha kontratu legal ruma ho autoridade, no ikus mai Caet foti desijaun hodi hapara tiha kompañia Nidela.

Notisia relevante: COVID-19: Mosu Desijaun “Tatidik Malu” ba Fornesimentu Hahan Iha Ambeno 

Tuir karta ezonerasaun ne’ebé Oe-Kusi Post asesu, katak desijaun iha karta ne’e nia laran fahe ba parte tolu. Dahuluk kona-bá ezonera tiha Marcos Seo nia pozisaun nu’udar xefe komisaun COVID-19 iha Oe-Kusi Ambeno, daruak ezonera nia husi kargu diretór interinu saúde, no ikus liu mak kona-bá la extende tan ona nia mandatu ne’ebé hotu ona iha fulan Marsu liuba.

Xefe Gabinete Prezidente Autoridade RAEOA Agustinho Caet esplika, ezonerasaun ne’e katak laiha kolaborasaun no koordenasaun entre autoridade ho serbisu saúde rejional liliu iha Estadu emerjénsia liga ba moras virus corona (COVID-19).

“Sei nia kontinua hanesan ne’e serbisu sei la la’o, tanba ne’e ita nia Prezidente Autoridade tetu ba-mai tenke hasai nia husi diretó interinu saúde hodi nomeia fali ema seluk,” hatete Caet ba Oe-Kusi Post iha Numbei, Oe-Kusi Ambeno Tersa 21 Abril 2020.

Nia nia hatutan, despaisu ne’e iha rua, primeiru ezonera nia bazeia ba kompetênsia prezidente autoridade nian. Tuir loloos Marcos Seo nia extensaun mandatu ne’e remata ona iha fulan Jullu 2019.

“Husi Agustu mai to’o agora ita sedauk iha baze legal ba nia, agora iha despaisu ne’e depois ita iha nomeasaun hanesan Luis de Jesus Neno atu bele asume diretór interinu ne’e tanba ita hare no observa no mós hetan rekomendasaun husi nia funsionáriu sira iha saúde, husi hospital no fatin seluk,” nia esplika.

Eis Xefe Gabinete Ministériu Negósiu Estranjeiru no Kooperasaun (MNEK) ne’e konsidera despaixu ezonerasaun ne’e la’ós derepente de’it, maibé Prezidente Autoridade bolu atensaun xamada ba nia dala 5 ona no ikus liu mak iha rezidensia Madre Fransiscana sira nian.

“No prezidente hato’o ba nia katak sei ita boot la koopera, ida ne’e la la’o ba oin tanba ita serbisu ekipa liliu kona-bá serbisu saúde rejionál inklui prevensaun COVID-19,” esplika alumni UNTL ne’e.
Iha parte seluk, eis diretór saúde rejionál Oe-Kusi Ambeno, Marcos Seo rekoñese nia simu duni ona karta ezonerasaun ne’e iha loron Tersa 21 Abril 2020 iha oras tuku 4 lorokraik. Karta ezonerasaun ne’e, Seo hare iha asinatura husi Prezidente Autoridade ba RAEOA, José Luis Guterres (Lugu).

“Ida despaixu númeru 8 ne’e, ezonera ha’u nu’udar Prezidente Komisaun COVID-19 ho dotor Bartolomeu Pereira. Sira nomeia fali Nelson Martins mak troka ha’u nia fatin nu’udar Prezidente Komisaun COVID-19,” hatete Marcos Seo via kontaktu telemovél ba Oe-Kusi Post, Kuarta 22 Abril 2020.

Seo hatutan, despaixu númeru 9 kona-bá ezonera nia husi nia kargu diretór saúde interinu ne’ebé partense ba iha Sekretáriu Rejionál ba assuntu Saúde. Seo nia fatin ne’e, eis diretór sentru saúde postu Oe-Silo, Luis de Jesus Neno mak assume fali.

“Agora ita hein de’it iha karta ne’e mós propoin Luis de Jesus Neno sai interinu, maibé ita hein bainhira mak tomada de pose,” Seo esplika.

Nia hatutan, kona-bá despaixu númeru 20 nian tanba nia mandatu remata iha loron 31 Dezembru 2019. Foin dadauk extende tan ba fulan 3, husi Janeiru to’o Marsu.
Maske despaixu ne’e klaru ona katak, Luis de Jesus Neno, mak troka ona nia, maibé Marcos Seo to’o oras ne’e sei dúvida nafatin.

“Agora sira laiha kontinuasaun ba ha’u, maibé pimeiru despaixu ne’e mai hanesan ofisial ida, maibé ita hein de’it bainhira mak iha ema atu mai troka ha’u ne’e regras bainhira iha termu de entrega, entaun loos ona, ne’e regras,” Seo dúvida.

Marcos Seo la’ós dúvida de’it, maibé kestiona mós desijaun ne’e, tanba desijaun ne’e foti no desidi iha tempu Estadu emerjénsia ne’ebé tuir nia kompriensaun katak tuir loloos labele akontese maske antes ne’e Primeiru-Ministru, Taur Matan Ruak ezonera Elia Amaral husi nia kargu Vise Ministra Saúde mós la’o di’ak hela to’o ohin loron.

“Ha’u dúvida, iha duvida, tanba saida mak iha tempu ne’ebé mak agora mundu infrenta, sira hasai karta ezonerasaun ba kargu. Kargu ne’e ba ema hotu, maibé ha’u la satisfas to’o fim ita serbisu ne’e ema hotu para hanoin ida ne’e iha intensaun entre Prezidente Autoridade ho parte seluk. Ida ne’e mak ha’u la satisfas depois mak ita hare tok senáriu tuir mai ha’u sei hein nia para bele konstesta,” Seo kestiona despaixu ezonerasaun ne’e, maibé Agustinho Caet katak antes ne’e Prezidente Autoridade bolu ona atensaun ba nia dala lima ona hodi hadia serbisu no serbisu hamutuk, maibé Marcos Seo sempre halai ketak hodi ikus mai simu duni despaixu ezonerasaun ne’e.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter