Vitima visum obrigatoriu keixa ona ema nain 12 iha Ambeno

AMBENO (TOP) – Vitima visum obrigatoriu husi uma mahon Topu-Honis Kutet no Mahata, ofisialmente hatama ona keixa kontra ema hamutuk iha Prokuradoria Distrital Oe-Kusi Ambeno hodi kontra ema hamutuk nain 12 ne’ebé deskonfia involve iha kazu detensaun no halo visum obrigatoriu ba labarik feto sira ho idade menor iha Maiu tinan 2020.

Iha loron Sesta 02 Jullu 2021, inan-aman ho labarik feto ne’ebé sai vitima ba visum obrigatoriu hatama ona keixa bai ha Prokuradoria Distrital Oe-Kusi Ambeno.

Notisia relevante: Hafoin julgamentu, Pradet Ambeno kontinua obriga labarik Topu-Honis

Maria Magdalena Suni hateten, nia oan feto nain rua sai vitima ba visum obrigatoriu iha tinan 2020 iha Oe-Kusi Ambeno.

Vitima visum obrigatoriu hatama keixa kontra ema nain 12 iha Prokuradoria Distrital Oe-Kusi Ambeno, Sesta 02 Juñu 2021. Foto TOP/João Caunan.

Nia hatutan, sira hatama keixa iha Ministériu Públiku, tanba iha ema barak maka ba foti nia oan sira hodi halo visum obrigatoriu ba sira.

“Ohin ami mai iha ne’e, tanba ema ba foti ami nia oan sira halo visum obrigatoriu. Sira ba foti labarik sira no habosok ami katak, foti sira mai atu hatan iha Prokurador. Mai to’o Prokurador la husu sira, maibé sira foti ba subar fali iha Pradet depois halo visum ba sira. Tanba ne’e maka ohin ami mai hato’o ba nai-ulun sira hodi hato’o keixa no husu tuir tanba saida maka sira estraga ami nia oan sira, maibé ami inan-aman sira lahatene,” hateten Maria Magdalena Suni ba jornalista sira iha edifisiu Porkurador Distrital Oe-Kusi Ambeno, Sesta 02 Jullu 2021.

Nia hatutan, durante tinan barak hela ho nia oan sira iha uma mahon Topu-Honis, nunka hasoru problema ruma.

Notisia relevante: Sulan labarik feto sira durante semana ida maka foin halo visum obriga iha Ambeno

“Ami nunka hetan problema iha uma mahon Topu-Honis. Ha’u tama ho ha’u nia oan nain-rua desde Setembru 2015 to’o ohin loron ha’u nunka hetan Amu viola ha’u nia oan sira, maibé tanba saida makai ha loron 12 Juñu 2020, imi foti ha’u nia oan sira no ha’u mai buka tuir iha Ministériu”.

“Pradet sira le’es ha’u nia oan sira nia fatin lulik depois tau tan saida iha laran ne’e ha’u lahatene ida. Tanba saida maka ha’u mai husu iha Ministériu Públiku imi hatan dehan ha’u nu’udar inan-aman laiha direitu. Depois tanba saida maka imi subar ha’u nia oan sira depois ba estraga tan sira. Ha’u husu ida ne’e atu nain-ulun sira hotu tenke husu tuir kazu ne’e. Tanba saida maka imi estraga labarik sira hanesan ne’e”?.

Notisia relevante: Sulan labarik feto ho tinan 8 maka foin halo visum obriga iha Ambeno

“Estraga sira, ami inan-aman lahatene. Tanba saida maka ami inan-aman laiha direitu atu hatene tuir kona-ba visum ne’e”.

“Ami lori kazu ne’e ba oin atu buka hatene se maka estraga ha’u nia oan sira, no mós buka hatene se maka halo keixa kona-ba kazu ida ne’e. Ha’u husu ba nai-ulun sira ita tenke buka hatene ema sira ne’e to’o hetan. Tanba ami nia oan sira a’at ona, imi estraga hotu ona ami nia oan sira nia futuru. Ami nia oan sira sei ki’ik oan hela. Ha’u nia oan feto ida Joana Subun hetan visum nia foin halo tinan 9, no Deolinda Subun hetan visum foin halo tinan 7. Tanba saida maka imi estraga sira hanesan ne’e. Maske nia ema boot ida mós tenke husu ba nia katak, tanba saida makai mi estraga ha’u nia oan sira hanesan ne’e”.

Advogadu privadu, Miguel Faria hamutuk ho vitima visum obrigatoriu iha Oe-Kusi Ambeno, Sesta 02 Juñu 2021. Foto TOP/João Caunan.

Notisia relevante: Matilda Coa: durante tinan 17 iha Topu-Honis amo nunka ka’er ha’u nia isin

“Ha’u nu’udar inan-aman iha direitu, tanba saida maka imi dehan ha’u laiha direitu. Hafoin visum tiha labarik sira, ami hotu mai husu, ami hotu tama husu ba iha Ministériu Públiku katak tanba saida maka imi visum labarik sira, Ministériu Públiku hatan mai ami katak inan-aman sira laiha direitu atu mai buka imi nia oan sira”.

Iha fatin hanesan, vitima visum obrigatoriu Ermelinda Elu hateten, iha tempu ne’eba polisia hamutuk ho ONG sira ba foti sira iha uma mahon Topu-Honis Kutet katak, presija tun ba Oe-Kusi villa hodi ba hatan iha Ministériu Públiku oras ida ka rua hanesan ne’e maka lori ba fali uma mahon Topu-Honis.

“Sira bosok ami, sira sulan ami iha uma mahon Pradet durante semana ida depois maka halo visum obrigatoriu mai ami. Maske ha’u hatete ba sira katak amu nunka viola ha’u, maibé sira la fiar hodi halo visum obrigatoriu ba ha’u,” konta vitima Ermelinda Elu.

Notisia relevante: Ami sente ami nia fatin lulik moras to’o mii ran

Keixa ne’e aprezenta husi ekipa advogadu sira maka hanesan advogadu Pedro Aparicio, Miguel Faria no João Dun.

The Oe-Kusi Post (TOP) observa prosesu keixa ne’e lidera husi advogadu Miguel Faria ho João, inklui labarik vitima sira ho sira nia inan-aman.

"Iha semana kotuk Tolu Liu ba, Ami Nia julgamentu Liu husi telecomference ka online Liu husi tribunal rekursu Ne'ebe maka Hau kolega advogadu balu hateten katak deklarasaun ne'ebé mensiona iha públiku katak vitima balun ka labarik sira hetan visum obrigatoriu, no belun hetan ameasa, balun hetan torturasaun no balun nós ko’alia lori lian Indonézia karik dehan tahanan illegal. Serbisu ne'ebé Sira halo ne’e normalmente ne’e mai ho kalan no ameasa labarik, no labarik sira hetan visum obrigatoriu,” esplika advogadu Miguel Faria.

Notisia relevante: Polisia tenta atu foti sai tan labarik orfonatu 4 husi Topu-Honis Mahata

Nia hatutan, maske durante ne’e vitima ka labarik balun halo deklarasaun, no hatete katak, nia la sai vitima ba violasaun sexual husi amu ne’e, maibé autoridade sira buka meius oioin no halo visum ba labarik sira.

"Proses ida ne’e labarik maka sai vitima husi visum obrigatorio, tanba ne’e maka labarik sira husu ba advogadu para akompaña prosesu ida ne’e no buka tuir prosesu ida atu akompaña prosesu ida ne’e to'o iha Tribunal. Ho ida ne’e maka ohin ami halo denunsiu inisiu”.

João Caunan
Author: João CaunanWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista The Oekusi Post iha Ambeno, Oekusi, RAEOA. Bandu atu hetan envelope ka sasan ruma husi fontes informasaun sira.

PUBLISIDADE

Online Counter