AMBENO (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA), Rogerio Tiago de Fátima Lobato promete ona sei hala’o vizita ba sub-rejiaun Nitibe ho Pasabe iha semana ne’e nia laran hodi hare diretamente kondisaun real iha sub-rejiaun rua ne’e.
Ulun boot RAEOA ne’e katak, ninia vizita ba sub-rejiaun ne’e hodi hare direta kona-ba kondisaun estrada no bee moos nian.
“Semana ida ne’e ha’u komesa la’o ba iha sub-rejiaun sira hotu iha RAEOA, dezenvolvimentu iha Oe-Kusi labele iha de’it Pante Makasar, maibé Oe-Kusi iha sub-rejiaun tolu mak hanesan Pante Makasar, Oe-Silo, Pasabe, no Nitibe. Dezenvolvimentu tenki to’o ba fatin sira ne’e,” Prezidente Autoridade ba RAEOA, Rogerio Tiago de Fátima Lobato hato’o promesa ne’e liu husi konferensia ba imprensa sira iha nia gabinete iha Oe-Bau, Oe-Kusi Ambeno, Sábadu 03 Fevereiru 2024.
Komandante em Xefe das FAILINTIL dahuluk ne’e maske foin hahu tama serbisu iha loron 1 Fevereiru 2024, maibé observa ona katak, lala’ok serbisu administrasaun públiku iha mandatu eis Prezidente Autoridade RAEOA, Mari Bim Amude Alkatiri ho Arsenio Paixão Bano nian durante tinan 10 nia laran sentraliza de’it iha sub-rejiaun Pante Makasar maske governu sentral aprova osan ho montante boot hodi dezenvolve Ambeno tomak.
“Projetu pilotu Zona Espesial ba Ekonomia Sosial no Merkadu (ZEESM) hahu tama iha Oe-Kusi Ambeno iha tinan 2014 to’o 2023, governu sentral aloka osan boot, maibé ita hare dezenvolvimentu ne’e iha de’it Pante Makasar,” Prezidente Rogério observa.
Nia hatutan, tuir loloos ho montante osan boot ne’e Ambeno tomak oras ne’e bele la’o di’ak ona, maibé realidade la akontese ida.
“Sira atu sai ona mak foin hakfodak halo netik estrada husi ponte Noe-Fefan ba Suni-Ufe (Oe-Nunu), no husi Tono ba sub-rejiaun Oe-Silo. Entaun, durante tinan 10 nia laran sira halo saida iha Oe-Kusi tomak? Dezenvolvimentu ne’e labele konsentra de’it iha sub-rejiaun Pante Makasar,” Rogério esplika.
Prezidente Autoridade ba RAEOA, Rogério sita diskursu Primeiru-Ministru, Kay Rala Xanana Gusmão durante serimonia posse ba Prezidente Autoridade RAEOA ho nia membru autoridade sira katak, independensia ne’e dala ruma ema sira hela iha foho ne’eba seidauk sente, seidauk hetan benefisiu di’ak to’o ohin loron.
“Ema sira ne’ebe manan osan no goza independensia, maibe ita nia inan aman sira rihun ba rihun iha foho, la manan buat ida, ita tenki hare ema sira ne’e, ha’u nia konsentrasaun boot liu sei ba moris iha foho.”
“Ha’u mós sei ba vizita eskola sira hotu iha RAEOA, ami hala’o serbisu foin mak loron-rua, ami sei organiza gabinete, no mós Sekretariu Rejional sira mak tun ba terrenu, atu haree eskola sira hodi haree direta merenda eskolar funsiona ka la’e, ema sira fornese merenda eskola ne’e fornese tuir kontratu ka la’e, keta sira simu tiha ona sira fó itoan de’it, maibé osan barak hela ba sira nia bolsu, ha’u hakarak hetene buat sira ne’e hotu,” nia esplika.
Primeiru-Ministru, Kay Rala Xanana Gusmão hateten, iha IX Governu nia programa mós tau matan nafatin ba katuas no ferik sira ne’ebé governu konsidera nu’udar “Erois Vivos” sira tenki simu osan Estadu nian molok sira mate, sira mós bele sente ukun aan ne’e.
PM Xanana mós husu ba Koordenadór Komisaun ZEESM-TL atu halo planu no programa di’ak, nune’e hadia dezenvolvimentu labele iha de’it Oé-Cusse vila, maibé tenki too ba área rurál hotu, hodi povu sente dezenvolvimentu too no besik ba sira.
“Depois tinan hirak, afinal ZEESM ne’e mak estrada boot iha de’it Pante Makasar. Iha 2020 ha’u mai hale’u Oe-Kusi Ambeno tomak, tanba problema Covid-19, povu lamenta buat barak, estrada aat para mate. Kuandu ita temi ekonomia sosial tenke dezenvolve ekonomia husi baze hodi povu hetan benefisiu,” PM Xanana esplika liu husi nia diskursu iha serimonia tomada pose ba estrutura RAEOA ho ZEESM iha Hotel Fitun Lima iha Oe-Upu, Oe-Kusi Ambeno, Kuarta 31 Janeiru 2024.
