AMBENO (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA), Rogério Tiago de Fátima Lobato promete ona sei halo prosesu auditoria ba estrutura tuan sira hanesan Arsenio Paixão Bano ho nia membru autoridade sira, tanba maioria sira la marka prezensa iha seremonia tomada posse, no mós iha prosesu hand over.
Nia hatutan, eis Prezidente Autoridade RAEOA, Arsenio Paixão Bano ho nia membru autoridade sira halo ona hand over ba fasilidade sira hanesan kareta, motor no seluk tan, maibé sasan barak mak a’at tiha ona, nia parte sei halo auditoria ba Arsenio Bano ho nia estrutura sira.
“Ha’u simu posse iha loron 31 Janeiru 2024, tuir loloos, tuir regras ne’e kuandu ita simu ona posse ne’e, autoridade sesante tenki entrega sasan sira hanesan kareta motor no seluk tan, atu nune’e autoridade foun sira simu kedas sasan sira ne’e, maibé autoridade sesante lakohi entrega sasan hirak ne’e,” Prezidente Autoridade ba Rejiaun Administrativu Espesial Oe-Kusi Ambeno (RAEOA), Rogério Tiago de Fátima Lobato hateten liu husi konferensia ba imprensa iha ninia gabinete iha Oe-Bau, Oe-Kusi Ambeno, Sábadu 03 Fevereiru 2024.
“Iha loron 02 Fevereiru 2024 foin mak halo hand over kada Sekretariu Rejional sira, ha’u sente triste loos, tanba eis Prezidente Autoridade RAEOA, Arsenio Paixão Bano la marka prezensa iha tomada posse no prosesu hand over ne’e,” Rogério triste.
Rogério Tiago de Fátima Lobato hamutuk ho ema nain-6 simu tomada posse nu’udar Prezidente Autoridade ba RAEOA no nain-6 seluk nu’udar Sekretariu Rejional sira inklui ema nain-3 ba ZEESM nian husi Primeiru-Ministru, Kay Rala Xanana Gusmão iha loron Kuarta, 31 Janeiru 2024 iha Hotel Fitun Lima, Oe-Upu, Oe-Kusi Ambeno.
Hafoin simu posse ne’e, no iha loron Kinta 01 Fevereiru 2024, Prezidente Autoridade RAEOA foun ne’e ho nia estrutura membru autoridade sira hahu tama ona ba serbisu, maibé hasoru situasaun rezistensia hahu husi Arsenio Bano rasik ho nia estrutura sira.
“Primeiru ha’u mai iha edifisiu RAEOA ne’e odamatan sira taka-metin hotu, loloos buat sira hanesan labele akontese, iha demokrasia iha ema ne’ebé lakon, tenki simu ema ne’ebé manan, tenki halo tranzisaun ne’e normal pasífika, maibé ita nia sentidu demokrasia ne’e sei fraku dala ruma halo ema balun triste mak sira lakoi koopera ho ha’u,” Rogério esplika.
Nia hatutan, durante hala’o enkontru dahuluk ho membru autoridade rejional sira, nia hetan informasaun katak, atividade hand over la’o dadauk ona, maibé sasan barak mak a’at tiha ona.
“Tanba ne’e ha’u husu sei halo auditoria ba eis Sekretariu Rejional sira inklui eis Prezidente Autoridade RAEOA, Arsenio Paixão Bano. Sekretariu Rejional balun halo ona hand over kapas, balun koopera di’ak, maibé balun sei iha rezistensia ka lakoi halo hand over, tanba ne’e horseik ha’u bolu ona Komandante Polisia RAEOA nian, hato’o ona problema ne’e, se aban ka bairu sira lakohi hand over, ha’u haruka polisia ba ka’er, tanba sasan Estadu hakarak ka lakohi tenki entrega ba Estadu,” Rogério esplika.
Nia hatutan, Estadu ne’e la’os ema individual ida nian, Estadu ne’e ema hotu nian, tenki iha responsabilidade, se ulun toos nafatin sei prosesa sira tuir lei.
“Sasan Estadu nian ne’e la’os Arsenio Bano nian, ne’e sasan Estado, ha’u mós horseik enkontru ona ho Sekretariu Rejional sira, no sira mós informa mai ha’u katak, iha Sekretariu balun iha funsionariu kontratadu barak-liu, maibé sira nia kontratu remata ona iha loron 31 Dezembru 2023, maibé loron-loron tama serbisu nafatin, lahatene se mak haruka sira tama nafatin. Tanba ne’e tenke iha auditoria ba kestaun sira ne’e.”
