AMBENO (TOP) – Molok governu sentral liu husi reuniaun Konsellu Ministru sira hodi nomeia estrutura foun ba Rejiaun Administrativu Espesial Oe-Kusi Ambeno (RAEOA), no Zona Espesial ba Ekonomia Sosial no Merkadu (ZEESM) nian, Arsenio Paixão Bano liu husi konferensia ba imprensa katak, sentral eletrika iha Inur Sakato sei mate total, tanba hasoru dadauk ona krize kombustivel, maibé Prezidente Autoridade RAEOA, Rogerio Tiago de Fátima Lobato konsidera deklarasaun Bano nian ne’e bosok-ten.
“Ita boot sira hatene katak, antes mai simu posse, Arsenio Bano ko’alia katak, mina ba sentral eletrika Sakato besik atu hotu ona, ahi mós atu mate no seluk tan, maibé ne’e hanesan bomba relojia ida, sira monta ba iha administrasaun foun,” Prezidente Autoridade ba Rejiaun Administrativu Espesial Oe-Kusi Ambeno (RAEOA), Rogerio Tiago Lobato hateten liu husi konferensia ba imprensa iha ninia gabinete iha Oe-Bau, Oe-Kusi Ambeno, Sábadu 03 Fevereiru 2024.
Prezidente Autoridade ne’e husu ba povu Ambeno atu lalika fiar demais ba saida mak Bano ho nia grupu sira lansa durante ne’e, tanba nakonu de’it ho lia-bosok no lia-falsu.
Nia promete katak, ahi eletrisidade iha rai-ketan Ambeno sei lakan normal hanesan baibain, sei lakan durante horas 24 nia laran.
“Mina komesa tama ona, eletrisidade sei lakan 24 oras, la mate ha’u promete ba povu sira,” nia promete.
