AMBENO (TOP) – Eis Prezidente Autoridade (PA) ba Rejiaun Administrativu Espesial Oe-Kusi Ambeno (RAEOA) atual Sekretariu Jeral partidu FRETILIN, Mari Bim Amude Alkatiri ne’ebé durante ne’e ema balun hanai no adora nia nu’udar “BOM GESTOR” ikus mai hamutuk ho nia Camarada Arsenio Paixão Bano nu’udar mós eis PA RAEOA “susesu” fó habokur de’it ba pilotu aviaun Zona Espesial ba Ekonomia Sosial no Merkadu (ZEESM) durante tinan 10 nia laran.
Hafoin detekta kazu ne’e, Prezidente Autoridade (PA) Rejiaun Administrativa Espesiál Oe-Kusi Ambeno (RAEOA), Rogerio Tiago de Fátima Lobato foti ona desijaun hodi hapara kedas kontratu ba pilotu estranjeiru na’in-rua iha aviaun ZEESM tanba konsidera, autoridade sesante kontrata sira ho saláriu boot liu, kada fulan RAEOA tenki selu rihun U$ 29.
PA Rogério Lobato hateten, durante ne’e autoridade sesante sira kontrata pilotu ba aviaun ZEESM na’in-rua, pilotu mane kada fulan simu rihun U$ 29 inklui akomodasaun no despeza balun no pilota feto simu rihun U$ 3.
“Agora ne’e ita la manán buat ida, bainhira ita semo loron-loron, osan ne’ebé ita simu hosi billete aviaun rihun U$ 6 fulan ida, maibé RAEOA tenki selu ba pilotu ne’e rihun U$ 23, aumenta tán akomodasaun no despeza seluk-tán rihun U$ 29 kada fulan, ne’ebé sei ha’u hatama de’it rihun U$ 6 kada fulan tanba saida maka selu pilotu ida kada fulan rihun U$ 29 dollár seidauk konta tán ho pilota feto-ida kada fulan selu rihun U$ 3,” PA Rogério hateten liu husi konferensia ba imprensa iha nia gabinete Oe-Bau, Oe-Kusi Ambeno foin lalais.
Nia hatutan, kontratu ne’ebé autoridade sesante selebra ilegal, nune’e nia deside termina kontratu maske sei vale hela to’o 31 Agostu 2024.
“Ha’u tenki hola desizaun ida atu suspende lai voo no suspende mós kontratu ida-ne’e ho pilotu sira, ha’u sei tau ekipa legál sira atu estuda tanba kontratu ne’e loloos to’o 31 agostu 2024, maibé ha’u labele fó osan RAEOA nian ba sira, kuandu haree katak buat ne’e laloos ona ilegál , tanba ne’e prezuizu bo’ot ba Estadu,” Rogério esplika.
Nia hatutan, durante tinan barak ona, aviaun ZEESM halo operasaun iha rai laran de’it, Díli-Oe-Kusi Ambeno, no Suai ho pasajeiru na’in-16 de’it. Maibé, Estadu lakon ona osan millaun U$ 26 ba aviaun ne’e rasik, kompara ho nia reseita durante tinan 10, foin hatama de’it millaun U$ 4 ba kofre Estadu.
“Ita iha defisít ida millaun U$ 26, ne’e osan ne’ebé ita lakon, ne’e duni ha’u senti situasaun ne’e grave tebes, sei ha’u hatene katak, ne’e prezuizu bo’ot ba RAEOA, no ha’u autoriza aviaun atu semo? ne’e labele akontese, ne’e duni aviaun ne’e tenki para tiha,” nia hateten.
Tanba ne’e, nia dehan, situasaun ida-ne’e sei informa ba Primeiru Ministru, kona-bá razaun hapara voo aviaun ZEESM nian, tanba RAEOA labele gasta osan árbiru.
“Tenki para tiha, sei ha’u kontinua ne’e ha’u konsidera hanesan krime dekumplisidade, no ha’u lakoi partisipa iha krime dekumplisidade,” nia esplika.
Prezidente Autoridade ne’e, esplika, hafoin Autoridade simu pose, desde fevereiru to’o daudaun ne’e, simu ona pedidu balun, hosi pilotu sira atu sosa pezas no bateria motorizada.
Maibé Autoridade haruka ekipa ida ba halo investigasaun, sira sosa pezas ne’e laiha kontrolu, foin daudaun pilotu sira dehan-tán aviaun aat hela, sira halo proposta ida Autoridade, persiza osan rihun U$100 atu sosa-tán motor ida.
“Klaru ha’u sei lá fó osan rihun U$ 100 ida hanesan ne’e, tanba ne’e la’os osan ha’u-nian, maibé osan povu nian, ne’ebé povu nia osan kuandu sai tenki ho prova loloos no justifikasaun klaru, ne’ebé ha’u sei bolu ha’u-nia ekipa juridíku ida, atu denúnsia kontratu ne’e,” nia esplika.
Tanba, nia dehan, ne’e la’os win win kooperasaun, katak sira manán ita mós manán, maibé durante ne’e sira maka manán de’it, tanba RAEOA kada fulan tenki selu rihun U$ 29, osan sira-ne’e sei la sai tán hosi RAEOA.
“Ne’e duni aviaun tenki para, no tenki haree kontratu, foin dadaun pilotu sira dehan, aviaun ne’e aat, derepenti dehan di’ak hela, hanesan semana kotuk tula Prezidente Repúblika ho Cardeál do Carmo da Silva mai Oe-Kusi Ambeno, ne’e di’ak, maibé hafoin ba fali Dili, sira dehan aviaun aat fali ona,” nia re-lembra.
Purtantu, Governu Timor-Leste, sosa aviaun ZEESM ne’e ho montante millaun U$ 7,700, hosi nasaun Canada iha 2013 ho tipu De Havilland Canada DHC-6 Twin Otter, no hahú halo operasaun iha Timor-Leste iha tinan 2015, entre Dili Oe-Kusi Ambeno no Suai.
Tuir dokumentu ne’ebé The Oe-Kusi Post (TOP) asesu iha Gabinete Prezidente Autoridade RAEOA, gastu ne’ebá gasta hahú husi tinan 2015 to’o tinan 2024 mak hanesan tuir mai ne’e:
- Operasaun iha 2016 gasta millaun U$ 1,638,930.00, ground handling (penanganan darat) gasta U$ 96,000.00, fuel (kombustivel) U$ 190,000.00 no spare Parts U$ 173,000.00.
- Tuir mai operasaun iha 2017 gasta millaun U$ 1,638,930.00, ground handling U$ 117,600.00, fuel U$ 202,000.00 no spare Parts U$ 160,000.75, no mós operasaun iha 2018 gasta millaun U$ 1,704,000.00 ground handling U$ 114,000.00 fuel U$ 203,000.58 no spare parts U$ 200,545.00.
- Operasaun iha 2019 gasta millaun U$ 1,875,455.00 ground handling U$ 103,200.00 fuel U$ 201,050.80 no spare parts U$ 195,600.00, operation iha 2020 gasta millaun U$ 1,776,000.00 ground handling U$ 108,000.00 fuel U$ 203,904.08 no spare parts U$ 245,500.50.
- Operasaun iha 2021 gasta millaun U$ 1,776,000.00 ground handling U$ 122,400.00 fuel U$ 2,039,004.08 no spare parts U$ 260,000.50, operasaun iha 2022 millaun U$ 2,082,246.54 ground handling U$ 164,770,43 fuel U$ 286,446.89 no spare parts U$ 275,650.00.
Nune’e mós operasaun iha 2023 gasta millaun U$ 2,337,879.35 ground handling U$ 82,237.35 fuel U$ 204,220.51 no spare parts U$ 300,000.00 no operasaun iha 2024 gasta U$ 996,000.00 no ground handling U$ 7,508.25.
“Ne’ebé totál ba operasaun U$15,825.440.89 ground handling U$ 915,716.03, fuel U$ 3,529,625.94 no spare parts U$ 1,536.646.75, operations ho maintenance Cost (biaya operasi no pemeliharaan) U$ 21.807,430.61 no aircraft price (folin aviaun) U$ 7,655,210.00 ne’ebé totál hamutuk millaun U$ 29,462.640.61,” sita iha dokumentu ne’ebé The Oe-Kusi Post (TOP) asesu.
Aviaun ZEESM la iha dokumentu orijinál faan no sosa
Prezidente Autoridade Rogério Tiago de Fátima Lobato, mós senti preokupa ho aviaun ZEESM ne’ebé durante hala’o operasaun Dili Oe-Kusi Ambeno no Suai, tanba laiha dokumentu orijinál kona-bá faan no sosa (buy of sell) hosi kompañia ne’ebé faan aviaun refere.
Purtantu, Governu Timor-Leste, sosa aviaun ZEESM ne’e ho montante millaun U$ 7,700, hosi nasaun Canada iha 2013 ho tipu De Havilland Canada DHC-6 Twin Otter, no hahú halo operasaun iha Timor-Leste iha tinan 2015, entre Dili Oe-Kusi Ambeno no Suai.
“Aviaun ne’e aora problema bo’ot hanesan ho Ró Haksolok, ita lahatene katak, aviaun ne’e ita-nia duni kala’e, tanba dokumentu ida naran bay of sell to’o agora ita seidauk iha orijinál,” Rogério preokupa.
Nia fó ezemplu, kuandu ita ba fatin ruma, atu hola karreta ida, ema faan karreta ne’e, nia tenki pasa ka fó invoice (bukti pembelian) ho nia dokumentu sira, hosi ne’ebé no kompañia ne’e naran saida.
“Tan ne’e, iha kazu aviaun nian ne’e, ita hatene katak, ita selu ona millaun U$ 7,700, atu hola aviaun ida, sira dehan aviaun ne’e foun, maibé aviaun ne’e la’os foun, ita selu ho folin bo’ot tebes, maibé to’o agora ita seidauk iha buy of sell ka karta ida dehan aviaun ne’e Timor-nian,” nia esplika.
Tan ne’e, Eis-Ministru Interiór ne’e, espera ba Autoridade Aviasaun Sivíl Timor-Leste (AACTL, sigla portugés), bele identifika didi’ak, nune’e bele intende didi’ak aviaun ZEESM nia estatutu rasik.
“Ita tenki buka barak, to’o agora ita seidauk iha bay of sell maibé ha’u husu ba AACTL, tanba nia nu’udar membru (ICAO, atu haree aviaun ne’e, sé nian, sé tau iha RAEOA nia naran tenki tau iha ne’ebá, tanba ita selu tiha ona millaun U$ 7,700 ba aviaun ne’e nia na’in,” nia esplika.
“Maibé sé tau iha ema seluk nia naran, ha’u hakarak hatene ema ne’e sé, ida-ne’e maka ha’u hakarak hatene, sei laiha RAEOA nia naran, tanba to’o daudaun ne’e seidauk iha dokumentu bay of sell, entaun tenki liuhosi ICAO atu identifika didi’ak aviaun ne’e, semak na’in loloos ba aviaun ne’e, RAEOA ka ema individuál ida,” konklui Rogério Lobato.
Hatan ba asuntu ne’e, eis Prezidente Autoridade RAEOA, Arsénio Paixão Bano husu ba autoridade RAEOA atuál bele komunika direita ho asesór legál sira no koordenadór aeroportu sesante, João Lima Tavares.
“Ne’e sira (Autoridade) haree kontratu de’it, sira ko’alia direita ho ema legál sira, asesór Igor no koordenadór aeroportu sesante, João Tavares.”
Nia informa, aviaun ZEESM ne’e sosa ho osan Estadu, relatóriu prestasaun kontas dezde 2015 haruka ba Tribunál Rekursu (TR) Primeiru Ministru (PM) no Prezidente Parlamentu Nasionál (PPN), Camara das Contas halo auditória no to’o agora buat hotu di’ak hela.
“Ne’ebé Autoridade bele husu direita ba ema legal sira, asesór Igor no koordenadór aeroportu sesante, João Tavares, ne’ebé sira hatene dokumentu sira-nee rai iha ne’ebé, maibé ha’u dehan de’it, masa sosa aviun dokumentu laiha, sosa sepeda de’it kwitansi iha, aviaun laiha fali ne’e,” Bano esplika.
Antes ne’e Ministru Transporte no Komunikasaun (MTK), Minguel Marques Gonçalves Manetelu, hamutuk ekipa tékniku hosi Aeroportu no Navegasaun Timor-Leste, Empreza Públika (ANATL,E.P). No, mós Autoridade Nasionál Komunikasaun Timor-Leste Institutu Públiku (ANCTL,IP), observa funsionamentu aeroportu Rota do Sandallu Oé-Cusse ba futuru bele atribui ona sertifikadu internasionál hosi Organizasaun Internasionál Aviasaun Sivíl (ICAO, sigla inglés) inklui rejista aviaun ZEESM.
Kona-ba, tuir rezultadu auditoria husi Tribunal Câmara das Contas Número 01/2018 Volume I ho Volume II entre tinan 2014-2015 ne’ebé The Oe-Kusi Post (TOP) asesu katak iha infrasaun finanseira lubuk ida ne’ebé komete husi Autoridade RAEOA/ZEESM iha ezekusaun orsamentu tinan 2014-2015.
Bele vizita link sira ne'e: https://www.tribunais.tl/wp-content/uploads/2020/07/RELATORIO_1_2018_RAEOA_Vol_I_FINAL.pdf
Relatóriu Tribunal Câmara de Contas (TdC) ne’e mós husu ba instituisaun kompetente tenke halo implementasaun. Katak, Ministériu Públiku tenke halo ona investigasaun ba iregularidade hirak ne’ebé haktuir iha relatóriu Câmara de Contas sobre orsamentu RAEOA/ZEESM. Instituisaun hirak ne’e tenke implementa ona tuir idak-idak ninia knaar konstitusional.
Rezultadu auditoria ne’e, hatudu projetu ho valor osan hamutuk millaun U$ 28.9, seidauk tán ho orsamentu 2016-2018 ne’ebé maka fó ona prejuízu maka’as ba osan Estadu nian, tanba autoridade halo de’it ajudikasaun direita, preço de marcação (hasa’e folin).
Relatoriu auditoria ne’e mós hetan no identifika katak Autoridade RAEOA halo kontratu ho PT. Wijaya Karya atu superviziona konstrusaun aeroportu Oe-Kusi Ambeno ne’ebé oras ne’e hanaran Aeroporto Internacional Rota do Sandalo.
Tribunal Câmara das Contas (TdC) konsidera, kontratu ho valor millaun U$ 5,523,700.00 ne’e la tuir lei aprovizionamnetu no pior liu konstrusaun lá-prienxe rekizitu tekniku no dezeñu no espesifikasaun tekniku iha konflitu (la tuir) dezeñu ne’ebé aprezenta ba TdC.
Hafoin Konstrusaun Aeroporto Oecusse kontinua aumenta ho orsamentu millaun U$ 78 populasaun hamutuk 70.000 depois hasae tan orsamentu ba millUN $120 tuir lei orsamentu millaun U$ 5 prosesu tenki lori ba Tribunal hodi halo aprovasaun, maibé iha RAEOA tuir relatório husi TdC dehan projetu fó de’it ba Kompañia WIKA (adjudikasaun direta).
Eis PA RAEOA atual Sekretariu Jeral Partidu FRETILIN Mari Bim Amude Alkatiri hodi lidera projetu pilotu ho naran Zona Espesial ba Ekonomia no Sosial Merkadu (ZEESM) iha Rejiaun Espesial ba Administrativu Oe-Kusi Ambeno (RAEOA), maibé rezultadu serbisu tinan hitu (7) nia laran, halo de’it estrada oan-sira iha suku ha’at (4) laran, la’os iha suku 18.
