AMBENO (TOP) – Povu sira iha suku Bobokase no Nipane oras ne’e sente haksolok tebes ho seremonia inagurasaun estrada rai-rahun husi aldeia Bihala ba to’o Kutet, tanba loos duni durante tinan barak kondisaun estrada ne’e a’at tebes, maibé labele haluhan katak, folin estrada rai-rahun ne’ebé inagura diretamente husi Primeiru-Ministru, Taur Matan Ruak ho Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano ne’e la’os ki’ik.
Total osan ba estrada rai-rahun ho distansia kilometru 14 ne’e mak milaun $ 2.623.959.80 ne’ebé tuir loloos tenke hetan estrada ida di’ak ho asfaltu, la’os ho estrada rai-rahun hanesan oras ne’e dadauk akontese.
Notisia relevante: Bano ho PM Taur hamutuk inagura ona estrada pedasuk ida iha Bihala
Loos duni, povu ki’ik sira iha área rural oras ne’e sente haksolok tebes, tanba durante tinan barak sira ladun hetan asesu ba estrada ho kondisaun di’ak. Valor kontratu ba rehabilitasaun estrada ne’e atu karun ka la’e, ka montante osan millaun rua resin ne’e balansu ho rezultadu serbisu ka la’e, sira la preokupa ida. Importante ba sira mak pelu-menus bele hetan netik kondisaun estrada ida hanesan ne’e.
Durante tinan lima nia laran, husi 2015 to’o 2017, governu sentral sempre taka matan mak fakar (aloka) osan barak ba Oe-Kusi Ambeno ho objetivu atu halo rejiaun enklave ne’e sai husi izolamentu, no bele sai nu’udar sasukat dezenvolvimentu ba munisipiu sira seluk iha rai-laran. Infelizmente, osan hirak ne’e Prezidente Autoridade ba RAEOA dahuluk Mari Bim Amude Alkatiri ho nia aliadu sira inklui Arsenio Paixão Bano fakar de’it ba suku 4 iha Oe-Kusi Ambeno, la’os fakar ba Ambeno tomak. A’at liutan, dezenvolvimentu iha RAEOA ne’e mós nakou ho indikasaun krime korupsaun, abuzu poder no krime seluk tan tuir rezultadu audioria Tribunal Camara de Contas nian.
Notisia relevante: Auditoria Câmara de Contas detekta Alkatiri depozita osan ZEESM iha BNU no Mandiri
Povu Ambeno tomak, liliu povu sira iha Bobokase ba to’o Kutet merese atu hetan estrada ida di’ak, la’os hetan fali estrada rai-rahun ne’ebé tolan tomak osan lubuk ida. Montante osan ne’e la iha balansu ho rezultadu serbisu ne’ebé iha, tanba osan milaun rua resin ne’e bele halo estrada ida ho asfaltu, la’os kari de’it ho rai-rahun.
Notisia relevante: Kamarada Bano aprova projetu ba kamarada Eurico da Rosa Lalisuk
Lala’ok serbisu Bano nian durante ne’e sempre lansa projetu barak duni, maibé The Oe-Kusi Post (TOP) observa rezultadu husi projetu hirak ne’e maioria la lori benefisiu ba povu, benefisia de’it ba emprezariu sira ne’ebé nu’udar mós estrutura no militante radikal FRETILIN iha Oe-Kusi Ambeno. Faktu balun hatudu, emprezariu sira ne’ebé durante ne’e hetan previleziu husi Bano nia ukun ne’e maioria husi partidu FRETILIN, maibé sempre produz rezultadu la ho kualidade.
Notisia relevante: Kamarada Eke deskonfia ”piska matan” ho kamarada Bano hodi abandona projetu Nunu-Henu
Evidensia husi projetu hirak ne’ebé la fó benefisiu ba povu mak projetu gabiaun (bronjong) ne’ebé Bano foti fó de’it ba nia kamarada FRETILIN sira iha tinan kotuk. Obra hirak ne’e balun mota lori tiha ona, no balun la funsiona total, maibé Bano ho nia kamarada sira sempre tebe-retek katak, dezenvolvimentu iha Oe-Kusi Ambeno durante ne’e la’o di’ak tebes no iha rezultadu di’ak, realidade hatudu kontradiz ho saida mak Bano deklara.
Notisia relevante: Foin maka halo fulan 4 projetu gabiaun iha Ambeno hetan ona estragus
