AMBENO (TOP) — Autoridade Rejiaun Administrativu Espesiál Oe-Kusi Ambeno (RAEOA), foin harii projetu gabiaun fulan haat (4) iha Outubru 2021, daudaun ne’e hetan ona estragu husi korente mota, tanba maioria obra sira halo ho tipu emejénsia.
Tuir dadus ne’ebé The Oé-Kusi Post (TOP) asesu, autoridade RAEOA ne’ebé lidera husi Arsénio Paixão Bano (FRETILIN) fó tenderizasaun ba kompañia lokál sira iha Oe-Kusi Ambeno, hamutuk kompañia 19 hodi konstrui projetu gabiaun unidade 19 iha teritóriu Oe-Kusi Ambeno ho objetivu atu satan mota sira hodi labele estraga komunidade sira nia rai no seluk tan iha mota-ninin.
Infelizmente, projetu gabiaun hirak ne’e la’os atu lori salvasaun, maibé lori fali dezastre boot ba komunidade sira basa lakonsege satan mota-been.
Projetu unidade 19 ne’e maioria oferese de’it ba militante FRETILIN sira mak ezekuta projetu emerjénsia ne’e ho durasaun loron 120, no kompañia sira tenki remata obra hirak ne’e iha janeiru 2022 nia rohan. Maibé, infelizmente to’o ohin loron, projetu hirak ne’e seidauk finaliza, maibé iha empreza balu oras ne’e simu ona pagamentu hosi autoridade RAEOA.
Maske nune’e tuir informasaun ne’ebé The Oe-Kusi Post (TOP) asesu, iha projetu unidade tolu maka daudaun ne’e hetan ona estragu total hosi korenti mota, maibé autoridade seidauk iha serteza hodi fó solusaun.
Tuir dadus, ne’ebé The Oe-Kusi Post (TOP) asesu, projetu unidade tolu ne’ebé hetan estragu mak hanesan, gabiaun Noel-Ekat, kontrui husi kompañia Zaunár Unipesoál, Lda, ho osan $133.000.29, projetu Gabiaun Noa-Ana, kontrui husi kompañia Mambuti Unipesoál Lda. Ho total orsamentu ba kontratu $51.763.25, projetu gabiaun Nifu-Namanas, konstroi husi kompañia Jerife-Lalin, Unipesoál, Lda, ho valór kontratu $18.733.55.
Nune’e, xefe suku Lela-Ufe, José Neno Sila, sente preokupa ba Kompañia sira nia kapasidade, tanba projetu hirak ne’e foin halo liu de’it fulan haat, oras ne’e hetan ona estragu, nune’e nia husu ba autoridade RAEOA atu fó solusaun tanba obra sira ne’e gasta povo nia osan.
“Foin dadauk kompañia Mambuti mai haree, no promete ba komunidade sira no autoridade lokál iha suku Lela-Ufe katak, udan para maka foin kontinua hadia fila-fali tanba ne’e gasta osan Estadu, maibé loron determisaun hadia fila-fali gabiaun ne’e seidauk fixu, sei karik la realiza nia promesa. Ami sei ejize nafatin ba Sekretariu ba Asuntu Agrikultura maka responsavél ba projetu sira ne’e, nia mak na’in ba projetu sira ne’e,” informa José Neno Sila ba The Oe-Kusi Post (TOP) liuhusi via kontaktu telemovél iha Domingu 09 Janeiru 2022.
Lidér lokál ne’e esplika, maske obra hirak hetan ona estragu maibé husi parte autoridade RAEOA to’o agora seidauk ko’alia buat ida, tan ne’e nia posisaun ejize nafatin ba Autoridade RAEOA hodi tau atensaun ba projetu ne’ebé maka responsavél ba obra estragu iha nia suku, tanba agrikultura presiza tebes obra ne’e hodi proteze natar no toos sira.
Preokupasaun hanesan mos husi xefe suku Ban-Afi, José Tefa, kestiona ba projetu gabiaun ne’ebé hetan estragu iha Nifu-Namanas, Aldeia Hautefo-Nefomtasa, Suku Ban-Afi, tanba Autoridade RAEOA hare ona, maibé seidauk iha informasaun atu hadia fila-fali.
“Autoridade sira mai hare ona, maibé ami hein to’o agora seidauk mai hadi’a, foin lalais sira dehan, iha fulan lae Abríl mak hadi’a, mais tuir lolos tenki hadia tanba obra ne’e seidauk remata,” nia dehan.
“Ha’u hare no presiza hadia duni. Tanba osan ne’e aloka mai iha ha’u nia suku Ban-Afi ne’ebé kompañia responsabiliza tenke rehabilita hodi komunidade sira bele sente duni projetu ne’e ninia kualidade,” xefe suku Ban-Afi hateten.
Ba kestaun ne’e The Oe-Kusi Post (TOP) esforsu atu komfirma xefe suku Bobometu, Yoseph Elo kona-ba progresu gabiaun ne’ebé maka hetan estragu iha Noel-Ekat maibé nia numeru kontaktu mate.
