AMBENO (TOP) – Ekipa investigador Komisaun Anti-Korupsaun (KAK) ne’ebé lidera husi Diretor Investiasaun Kriminal (UIK) Emilio Quintas serbisu hamutuk ho Polisia Nasional Serbisu Investigasaun Kriminal (PNSIK) halo ona buska no aprensaun ba Adjuntu Prezidente Autoridade RAEOA nia rezidensia iha Oe-Kusi Ambeno, tanba deskonfia involve prátika krime korupsaun partisipasaun ekonomiku durante ne’e.
Tuir Komunidade Imprensa ne’ebé The Oe-Kusi Post (TOP) asesu husi KAK katak, prosesu buska no aprensaun ne’e ohin akontese tiha ona iha oras tuku 8 dadersan. Asaun buska no aprensaun ba adjuntu Prezidente Autoridade RAEOA nia rezidensia ho naran inisial MN ne’e bazeia ba mandadu Tribunal Distritral Oe-Kusi Ambeno nian Número Unidade Crime (NUC)0057/21.PDOEC, 17 Dezembru 2021 asina husi juiz Yudi Pamungkas.
TOP observa direita iha prosesu buska no aprensaun ne’e, ekipa KAK ho PNSIK tama ba adjuntu Prezidente RAEOA MN nia rezidensia iha tuku 8:00 dadersan. Hafoin tama ba laran, parte polisia mós tau kedas Police Line ba rezidensia ne’e hodi bele fasilita prosesu buska no aprensaun. Rezidensia Adjuntu Prezidente Autoridade ba RAEOA nian ne’e besik malu ho hotel Rao, no laduk do’ok mós husi kampu basket ball Oe-Kusi Ambeno nian.
Informasaun seluk ne’ebé TOP asesu, MN antes ne’e serbisu iha parte saúde nian iha Oe-Kusi Ambeno, nia husi suku Naimeko, no bainhira partidu FRETILIN tama viabiliza governasaun atual ne’ebé lidera husi Primeiru-Ministru, Taur Matan Ruak, MN tanba mós nu’udar militante FRETILIN ida, nune’e ikus mai hetan promosaun ida hodi assume kargu nu’udar Adjuntu Prezidente Autoridade RAEOA desde loron 12 Juñu 2020 to’o ohin loron.
MN mós deskonfia nu’udar nain ba kompañia NABILAN CLEANING SERVICE UNIP. LDA ne’ebé desde tinan 2020 to’o ohin maka manan projetu Cleaning Service ba edifisiu públiku sira hotu iha Oe-Kusi Ambeno. Empreza Cleaning Service iha Oe-Kusi Ambeno iha rua de’it. Ida maka PAX ne’ebé responsavel hamoos parte exterior, no NABILAN CLEANING SERVICE UNIP. LDA maka hamoos interior.
Tuir dadus ne’ebé TOP asesu husi Timor-Leste eprocurement.gov.tl katak, iha tinan 2021 nia laran, empreza NABILAN CLEANING SERVICE UNIP. LDA hetan projetu cleaning service hamutuk 24 ho osan hamutuk $334,194.85 USD, maioria projetu sira ne’e iha de’it Oe-Kusi Ambeno.
Adjuntu Prezidente Autoridade RAEOA ne’e mós nu’udar nain ba Loja Salu Mata ne’ebé lokaliza kedas iha ninia uma sorin.
Ho kestaun ne’e, antes ne’e investigador KAK sira hala’o ona prosesu investigasaun ba kazu ne’e kuaje semana ida iha Oe-Kusi Ambeno iha loron Sesta, 19 Novembru 2021, no ohin maka foin ba halo buska no aprensaun ba adjuntu Prezidente Autoridade ba RAEOA ninia rezidensia.
Notisia relevante: KAK hahu investiga ona ema balun iha Ambeno
Komunikadu Imprensa husi KAK katak, mandadu ne’e fó poder mai investigador KAK nian hodi halo operasaun buska no apreensaun ba emprezariu nain ida (1) ho ema importante (Personal Expose Person) iha autoridade RAEOA/ZEESM tamba diskonfia envolve iha kazu krimi korrupsaun.
“Operasaun loron ohin ekipa investigador CAC nian halao tamba iha indisus forte arguidu sira komete kazu krimi brakamentu kapitais (arto 313 Kodigu Prosesu Penal Timor-Leste KPPTL), kazu krimi korrupsaun pasiva no krimi korrupsaun aktiva akontese iha area juridiksaun RAEOA Oecusse nian,” esplika karta komunidade ba imprensa husi KAK, Tersa, 18 Janeiru 2022.
Operasaun buska no apreensaun ida ne’e dahuluk liu KAK hala’o iha munisipiu sai husi kapital Dili iha historia KAK nian hafoin estabelese no operasiona iha tinan 2010 liu ba bazeia ba mandatu Lei Numeru 8/2009 15 Jullu.
“Kazu ne’e rasik hetan delegasaun kompetensia husi Prokurador DFistrital Oecusse hodi investigador CAC sira halo prosesu investigasaun ho kuidadozu atraves rona sasin sira, halibur dokumentus no halo survelencia bai ha intervenenti prosesual, liu-liu arguidu nian bens sira.
Iha prosesu investigasaun naruk nian laran ne’e revela indisus krimi forte hodi halo promosaun ba buska domisiliariu hatu’ur iha arto 170 KPPTL no apreensaun arto 172 KPPTL ne’ebé realiza Tersa-feira (18/1) ohin”.
Ekipa sira ne’ebé ohin halo buska no aprensaun ba adjuntu Prezidente Autoridade ba RAEOA, MN nia rezidensia ne’e hamutuk ema nain 9, nain 7 husi KAK, no akompaña ho PNSIK nain 2.
