AMBENO (TOP) – Operasaun buska domisiliaria no apreensaun ne’ebé hala’o husi investigador Komisaun Anti-Korupsaun (KAK) akompaña husi Polisia Nasionál ba Serbisu Investigasaun Kriminal (PNSIK) konsege halibur dokumentus lubun boot; konta bankaria, osan cash ho montante boot, dokumentus kompañia nian, telefone no dokumentu projetu eletrifikasaun, no projeitu balun iha RAEOA/ZEEMS iha adjuntu Prezidente Autoridade RAEOA nia rezidensia iha Sikluli, Oe-Kusi Ambeno.
KAK konsidera evidensia hirak ne’e nu’udar objetu krime ida.
Notisia relevante: KAK buska ona rezidensia adjuntu Prezidente Autoridade RAEOA iha Ambeno
Tersa ohin, 18 Janeiru 2022, KAK akompaña ho PNSIK ne'e ezekuta no asegura mandadu Tribunal Distrital Oe-Kusi Ambeno nian ho Número Unidade Crime (NUC) 0057/21.PDOEC, 17 Dedzembru 2021.
Tuir Komunikadu ba Imprensa husi KAK nian ne’ebé The Oe-Kusi Post (TOP) asesu, mandadu ne’e fó poder ba investigador KAK nian hodi halo operasaun buska no apreensaun ba suspeitu diretor emprezariu nain ida (1) hanesan mós subriñu husi suspeitu seluk nudar Jerente Senior RAEOA/ZEESM ho nia kaben (co-autor ne’ebé posibilidade bele sai suspeitu) tanba deskonfia envolve iha kazu krime korrupsaun.
Mandadu ba buska iha domisiliariu no prende sasan ne’e juiz haruka no fó orden atu halo buska iha domisiliariu ho posibilidade ba prende sasan ne’ebé mak iha ligasaun ho faktu hirak ne’ebé investiga ona, tuir despozisaun iha art 37 no nu 2, husi KRTL, iha artigu 226 no 1, al. c) artigu 108 no 1 artigu 170, hotu-hotu husi KPP ba suspeitu ninian hela fatin.
Orden ba halo buska ne’e konsede iha autu inkeritu nian NUC S(ic.NUCNo), husi ne’ebé investiga dadaun hela suspeitu kona-ba auto krime, p.p husi artigu kodegu penal nian.
Ba kumprimentu efetivu ba mandadu ida ne’e IHA AUTORIZASAUN ba asesu iha dependensia hotu-hotu, inklui kofre, fatin hirak rai sasan nian, veiklu hirak ne’ebé uza husi suspeitu, bele fera odamatan, hakat sae husi moru no neutraliza animal sira, se presija duni, ho observansia ba dispozisaun iha artigu 169 no 170 husi KPPTL.
Operasaun loron ohin ekipa investigador KAK nian halao iha ZEESM-TL tanba iha indisiu forte arguidu sira komete kazu krimi brakamentu kapitais (art 313 Kodigu Prosesu Penal Timor-Leste KPPTL), kazu krime korrupsaun pasiva no krime korrupsaun ativa akontese iha área juridiksaun Rejiaun Administrativu Oe-Kusi Ambeno nian.
Operasaun buska no apreensaun ida ne’e dahuluk liu KAK hala’o iha munisipiu sai husi kapital Dili iha historia KAK nian hafoin estabelese no operasiona iha tinan 2010 liu ba bazeia ba mandatu Lei Numeru 8/2009 15 Jullu.
Kazu ne’e rasik hetan delegasaun kompetensia husi Prokurador Distrital Oe-Kusi Ambeno hodi investigador KAK sira iha poder lei halo prosesu investigasaun ho kuidadozu hanesan rona sasin sira, halibur dokumentu sira, no halo survelensia ba iha intervenenti prosesual liu-liu arguidu nian bens sira.
Iha prosesu investigasaun naruk nian laran ne’e, revela indisus krimi forte hodi halo promosaun ba buska domisiliariu hatu’ur iha arto 170 KPPTL no apreensaun arto 172 KPPTL ne’ebé realiza iha arguido nia rezidensia iha Sikluli, Oe-Kusi Ambeno iha loron Tersa, 18 Janeiru 2022.
Investigador KAK sira sei halo investigasaun klean liu tan hodi rekolha informasaun, evidensias balun mensiona iha karta mandadu buska no apreensaun ne’e atu revela verdade.
Operasaun ne’e hetan akompanhamentu direta husi prokurador titular no Juiz ne’ebé hatun mandadu buska no apreensaun Dr. Yudi Pamungkas.
