AMBENO (TOP) – Ekipa investigador sira ne’ebé kompostu husi Komisaun ba Anti-Korupsaun (KAK) ho Polisia Nasionál ba Serbisu Investigasaun Kriminal (PNSIK) tenke gasta oras 12 nia laran maka foin finaliza prosesu buska no aprensaun ba rezidensia adjuntu Prezidente Autoridade Rejiaun Administrativu Espesial Oe-Kusi Ambeno (RAEOA).
Tuir Komunikadu ba Imprensa husi KAK nian katak, ekipa konjuntu ne’e hahu halo operasaun buska no aprensaun ba rezidensia ema numeru daruak iha governasaun lokal RAEOA nia rezidensia ne’e hahu iha oras tuku 8 dadersan iha loron Tersa, 18 Janeiru 2022 no foin remata iha oras tuku 8 kalan tuir lei haruka.
Durante prosesu buska no aprensaun, tuir KAK katak, suspeitu adjuntu Prezidente Autoridade RAEOA-ZEESM-TL, MN ho nia familia sira kolabora di’ak tebes hodi hafasil ekipa investigador KAK nian konsege konklui operasaun buska no apreensaun iha oras 12 nian laran.
KAK dehan, mandadu ho NUC 0057/21.PDOEC, 17 Dezembru 2021 ne’e fó orden ba KAK hala’o operasaun durante oras 12 nian laran iha fatin tolu (3) diferente; rezidensia no garajen kareta adjuntu Prezidente Autoridade RAEOA-ZEESM-TL, MN iha Sikluli no edifisiu kompañia nian iha Padimau, Pante Makassar, Oe-Kusi Ambeno.
Notisia relevante: KAK buska ona rezidensia adjuntu Prezidente Autoridade RAEOA iha Ambeno
Ekipa investigador ne'ebé lidera husi Diretor Investigasaun Kriminal (UIK), Emilio Quintas akompaña ho Polisia Nasionál Serbisu Investigasaun Kriminal (PNSIK) nasionál ne’e hahu iha tuku 8;00 OTL dadersan no termina iha tuku 20;00 OTL kalan tuir lei.
Prosesu buska no aprensaun ne’e hetan akompañamentu mós husi prokurador titular no juiz Yudi Pamungkas husi inisiu to’o kalan.
Iha operasaun buska domisiliaria no apreensaun horseik, investigador KAK sira halibur no prende objetu krime hanesan dokumentu komprovativu manan projetu Cleaning Service iha RAEOA, konta bankaria, kareta rua (2), telefone, lap top, osan mean, osan cash ho montante boot, dokumentu kompaña nian, telefone no dokumentu sira kona-ba projetu eletrifikasaun no projeitu sira balun iha RAEOA ZEESM-TL ne’ebé suspeitu ho nia kaben nia kompañia manan nu’udar evidensia no objetivu krime.
Notisia relevante: KAK konsege foti ona osan ho montante boot iha rezidensia adjuntu Prezidente Autoridade RAEOA
Hafoin investigador sira termina operasaun buska domisiliaria no apreensaun, sei kontinua halo investigasaun maratona ba suspeitu adjuntu Prezidente Autoridade RAEOA-ZEESM-TL, MN ho nia kaben nu’udar diretora kompañia NABILAN CLEANING SERVICE UNIP. LDA iha edifisiu Prokuradoria Distrital Oe-Kusi Ambeno.
Investigador KAK simu mandadu husi Tribunal iha loron 5 Janeiru 2022 hodi hala’o operasaun buskan no apreensaun ne’e. Mandadu Tribunal Distrital Oe-Kusi Ambeno nian ne’e fó poder ba investigador KAK sira hodi halo operasaun buska no apreensaun ne’e, tanba deskonfia adjuntu Prezidente Autoridade RAEOA, MN involve maka’as iha kazu krime korrupsaun.
