AMBENO (TOP) – Ekipa investigador sira husi Komisaun ba Anti-Korupsaun (KAK) aprezenta ona objetu krime sira ne’ebé foti sai husi rezidensia adjuntu Prezidente Autoridade ba Rejiaun Administrativu Espesial Oe-Kusi Ambeno (RAEOA) ba iha Prokuradoria Distrital Oe-Kusi Ambeno hodi avansa ba iha prosesu julgamentu iha tempu oin mai.
Ekipa investigador KAK ne’ebé akompaña husi Polisia Nasionál ba Serbisu Investigasaun Kriminal (PNSIK) ezekuta mandadu Tribunal Distrital Oe-Kusi Ambeno nian hodi halo operasaun buska no aprensaun ba rezidensia adjuntu Prezidente Autoridade ba RAEOA nia rezidensia ne’e iha loron Tersa, 18 Janeiru 2022 iha oras tuku 8 dadersan to’o tuku 8 kalan maka foin remata.
Tuir KAK katak, prosesu operasaun buska no aprensaun ba rezidensia ema númeru daruak iha estrutura governasaun lokal Oe-Kusi Ambeno ne’e bazeia ba mandadu Tribunal Distrital Oe-Kusi Ambeno ho Númeru Unidade Crime 0057/21.PDOEC, 17 Dezembru 2021.
Iha operasaun buska domisiliaria no apreensaun ne’e, investigador KAK sira konsege halibur no prende objetu krime sira hanesan dokumentu komprovativu husi empreza NABILAN CLEANING SERVICE UNIP. LDA ne’ebé durante ne’e manan tomak projetu Cleaning Service ba edifisiu públiku sira iha RAEOA, konta bankaria, kareta rua (2), telefone, lap top, osan mean, osan cash ho montante boot, dokumentu kompañia nian kona-ba projetu eletrifikasaun no projeitus balun iha RAEOA/ZEESM ne’ebé suspeitu ho nia fen-kaben ninia kompañia manan nu’udar evidensia objetivu krime.
Notisia relevante: KAK buska ona rezidensia adjuntu Prezidente Autoridade RAEOA iha Ambeno
Investigador KAK tutelar, Natalino Sarmento no Horacio Lopes submete ona objetu krime hirak ne’e ba iha prokurador ne’ebé ka’er kazu ne’e no akompanha husi Polisia Nasional Servisu Investigasaun Kriminal (PNSIK) Nasional nian iha loron Kinta, 20 Janeiru 2022 iha oras tuku 10 dadersan.
Hafoin submete objetu apreensaun sira ba prokurador, sei hetan validasaun husi juiz Tribunal Distrital Oe-Kusi Ambeno no haruka fali ba KAK hahu hala’o prosesu investigasaun kriminal ba suspeitu sira no ema hirak ne’ebé intervienente prosesual nian.
Durante operasaun buska no apreensaun ne’e, investigador KAK ne’ebé lidera husi Diretor Investigasaun Kriminal Emilio Quintas obrigado tenki estraga propriedade suspeitu nian balun iha edifisiu kompañia NABILAN CLEANING SERVICE UNIP. LDA nian iha Padimau, Pante Makassar, Oe-Kusi Ambeno, tanba savi armari la iha no oras tuir mandadu juiz nian besik termina ona.
Mandadu ho NUC 0057/21.PDOEC, 17 Dezembru 2021 ne’e fó orden ba KAK hodi hala’o prosesu operasaun durante oras 12 nian laran iha fatin tolu (3) diferente; rezidensia no garajen kareta adjuntu Prezidente Autoridade RAEOA, MN iha Sikluli no edifisiu NABILAN CLEANING SERVICE UNIP. LDA nian iha Padimau, Pante Makassar.
