DILI (TOP) – Durante loron hirak nia laran públiku sente hakfodak no pániku itoan ho movimentu no intervensaun husi Komisaun ba Anti-Korupsaun (KAK), liu-husi ekipa Medida Prevensaun no Kombate Korrupsaun hasoru ema sira ne’ebé naran tama ona iha lista akuzasaun Ministériu Públiku nian, tanba deskonfia halo buat aat kontra tara-bandu sira iha Timor-Leste.
Instituisaun prevensaun no kombate korupsaun ne’ebé harii iha governasaun Primeiru-Ministru, Kay Rala Xanana Gusmão nian iha tinan 2009 liuba, hetan elojia no apresiasaun husi públiku relasiona ho ezekusaun mandatu Tribunal nian hodi ba halo buska no aprensaun ba Prezidente Federeasaun Futebol Timor-Leste (FFTL) atual Ministru Asuntu Parlamentár no Komunikasaun Sosiál (MAPKOMS), Francisco Jeronimo nia sekretaria privadu, no MAPKOMS nia asesor ida iha Palásiu Governu, no ohin inklui tan MAPKOMS rasik.
Serbisu hirak ne’e hotu, KAK merese hetan apresiasaun husi públiku, maibé iha parte seluk, públiku mós oras ne’e sei kontinua hein hela KAK nia asaun balun ba serbisu sira ne’ebé antes ne’e hala’o tiha ona.
Artigu 3 (2) Lei Nú. 8/2009 kona-ba kriasaun Komisaun Anti Korrupsaun (KAK/CAC) abtribui KAK ho estatutu nu'udar orgaun polisia kriminal espesializada iha Timor-Leste. Nune’e, KAK durante ne’e konsege hala’o ona serbisu balun hanesan iha inisiu tinan ida ne’e, KAK halo ezekuta mandadu Tribunal Distrital Oe-Kusi Ambeno nian hodi halo buska no aprensaun ba rezidensia Adjuntu Prezidente Autoridade RAEOA iha Ambeno iha loron 18 Janeiru 2022.
Le’e ida ne’e: KAK buska ona rezidensia Adjuntu Prezidente Autoridade RAEOA iha Ambeno
KAK ho FONGTIL mós simu ona keixa ida kona-ba deklarasaun Prezidente Autoridade RAEOA, Arsenio Paixão Bano nian ne’ebé sei tau osan hamutuk ka atu halo sosiu ho empreza lokal husi RAEOA hodi sosa tiha ro SUCCESS ne’ebé ikus mai emprezariu lokal ne’e konsege sosa duni ona.
Notisia relevante: Kona-ba sosa ro SUCCESS, empreza irmão Timor “sadik” KAK aselera investigasaun
Molok sosa ro SUCCESS ne’e, emprezariu lokal RAEOA ne’e deklara públikamente hodi “sadik” instituisaun KAK ne’e, maibé KAK dalaruma tauk mak to’o oras ne’e seidauk pronunsia buat ruma kona-ba keixa ne’e rasik.
Notisia relevante: Deskonfia futu-lia atu sosa ro SUCCESS, FONGTIL no KAK simu ona keixa ida
Serbisu hirak ne’e hotu, halo KAK hahu atu hatudu ona ninia si’ak ne’e no merese hetan apresiasaun no elojia, maibé públiku mós kontinua dezafia KAK atu tenke hatudu ninia si’ak ne’e loloos, labele si’ak kois de’it depois lakon tiha, ida ne’e labele akontese. KAK tenke si’ak to’o hotu hodi nune’e bele hamenus moras korupsaun sira iha Timor-Leste.
Maske KAK hatudu duni nia serbisu balun, maibé públiku kontinua dezafia KAK hodi halo mós intervensaun ba ro HAKSOLOK ne’ebé antes ne’e KAK mós tama hotu hodi halo prosesu investigasaun, maibé prosesu ba kazu ne’e sei kontinua la’o neneik liu hanesan lenuk.