DILI (TOP) – Diretor Kompañia Irmão Timor Unipessoal, Lda, Julio Mak “sadik” investigador Komisaun ba Anti-Korupsaun (KAK) nian ne’ebé simu ona keixa kona-ba polemika atu sosa ro SUCCESS ne’e tenke aselera prosesu investigasaun hodi hetan nia fukun ho loloos.
Tuir informasaun balun ne’ebé The Oe-Kusi Post (TOP) asesu katak, FONGTIL ho KAK simu ona keixa ida husi sidadaun ida kona-ba prosesu sosa ro SUCCESS ne’ebé iha indisiu krime korupsaun (partisipasaun ekonomia) no krime fase onsa (money laundry) ne’ebé deskonfia involve diretor kompañia Irmão Timor, Julio Mak alias Abi no Prezidente Autoridade RAEO-ZEESM-TL.
Notisia relevante: Deskonfia futu-lia atu sosa ro SUCCESS FONGTIL no KAK simu ona keixa ida
Keixa ne’e mós husu ba autroridade kompotente liu-liu KAK tenke loke prosesu investigasaun ba kompañia Irmão Timor nune’e bele deskobre. Husu mós ba KAK atu loke prosesu investigasaun hasoru Presidente Autoridade RAEOA kona-ba razaun saida maka tenki tau osan ba kompañia privadu ida hodi sosa ro SUCCESS, tanba saida maka la uja didiak orsamentu ne’ebé aloka ba RAEOA-ZEESM-TL hodi rezolve lalais tiha problema ro ahi HAKSOLOK ne’ebé kuaje tinan lima ona seidauk to’o mai Timor Leste.
Keixa ne’e mós ezije no rekomenda ba KAK atu halo kordenasaun ho Ministério Finansas liu-liu Diresaun Impostu no Tributária nian, no mós parte freebalance atu detekta rendimentu husi kompañia Irmão Timor ho razaun atu buka tuir osan deposit nia verdadeiru mai husi ne’ebé, tanba deskonfia katak, osan Presidente Autoridade RAEOA nian maka tau iha kompañia Irmão Timor Unipessoal, Lda hodi utiliza atu fase osan (money laundry) liuhusi halo investimentu sosa ro ahi SUCCESS no osan restu ho montante $1,300.000.00 USD.
Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano iha loron 19 Novembru 2021 deklara públikamente katak, parte autoridade mós sei sosiu hamutuk ho empreza Irmão Timor ho 30% hodi sosa ro SUCCESS ne'e, maibé tuir informasaun katak, to'o oras ne'e entre parte rua seidauk estabelese akordu formal ruma kona-ba sosiu ne'e, maibé parte Irmão Timor hahu troka ona karta korespondensia ho ro SUCCESS nia nain iha Malaysia.
Autoridade RAEOA mós to'o oras ne'e seidauk fó sai deklarasaun ruma kona-ba keixa ne'ebé hato'o husi sidadaun ida ba KAK kona-ba prosesu sosa ro SUCCESS ne'e.
Komisáriu Komisaun Anti Korupsaun (KAK) Sergío Hornai katak, KAK konsidera keixa ne’e kona-ba prosesu negosiasaun atu sosa ro SUCCESS ne’e.
“Iha keixa lubuk oan ida ne’ebé maka tama dadauk iha KAK más apezar keixa sira ne’ebé maka tama ita konsidera hanesan denúnsia ka krime ruma ne’ebé maka ita dezemvolve hela dadauk. Maibé hirak ne’e hotu ita sei halo distribuisaun ba iha unidade informasaun siguransa atu halo analiza klean ba prosesu sira ne’e,” hateten Komisáriu KAK Sergío Hornai ba The Oe-Kusi Post (TOP), iha CNE, Kai-Koli, Dili, Kinta, 09 Dezembru 2021.
“Podesér mós ba iha keixa sira ne’ebé maka tama hosi komunidade Oe-Kusi nian ba iha asuntu sira balun ne’ebé maka relasionámentu tantu ba iha atividade transporte maritime ninian hanesan saida maka keixa kona-ba ro SUCCESS ne’e”.
Maske nune’e, diretor kompañia Irmão Timor Unipesoal, Lda, Julio Mak alias Bee Kheong Mak katak, nia la tauk ida, tanba tuir nia katak, nia iha duni osan maka hakarak atu sosa ro ne’e.
“Ha’u la tauk ida. KAK mai mós tenke iha evidensia maka ne’e,” hateten Julio Mak via kontaktu telemovél ba The Oe-Kusi Post (TOP) iha loron Sesta, 10 Dezembru 2021.
Julio Mak ka Bee Kheong Mak mós konsidera sidadaun ne’ebé keixa kontra nia iha KAK kona-ba prosesu negosiasaun atu sosa ro SUCCESS ne’e nakonu ho laran moras.
Tuir informasaun balun ne’ebé TOP asesu husi parte KAK nian katak, investigador sira iha KAK oras ne’e hala’o ona investigasaun preliminariu ba keixa ne’ebé KAK simu tiha ona husi sidadaun balun iha tempu hirak liuba.
