DILI (TOP) – Hafoin mosu keixa ida husi sidadaun ida ba iha Komisaun Anti-Korupsaun (KAK) ne’ebé konsidera kompañia Irmão Timor Unipesoal, Lda laiha kapasidade finanseira hodi sosa ro SUCCESS husi Malaysia, The Oe-Kusi Post (TOP) esforsu atu fó sai lista projetu sira ne’ebé durante ne’e kompañia Irmão Timor hetan husi autoridade RAEOA hodi hatan ba polemika sira ne’ebé oras ne’e la’o maka’as tebes iha sosiedade nia le’et.
Tuir keixa ne’ebé oras ne’e iha investigador KAK nia liman laran katak, ezije no rekomenda ba KAK atu halo kordenasaun ho Ministério Finansas liu-liu Diresaun Impostu no Tributária nian, no mós parte freebalance atu detekta rendimentu husi kompañia Irmão Timor ho razaun atu buka tuir osan deposit nia verdadeiru mai husi ne’ebé?
Tuir informasaun ne’ebé The Oe-Kusi Post (TOP) asesu husi Timor-Leste eProcurement Portal katak desde fulan Novembru to’o Dezembru tinan ida ne’e, empreza Irmão Timor hetan projetu fornesimentu kombustivel ba viatura (kareta) membru autoridade RAEOA sira nian ho nia valor osan hamutuk $45,892.75. Projetu fornesimentu kombustivel ba viaturas membru autoridade RAEOA sira ne’e foin maka halo pagamentu iha tinan 2021, maibé antes ne’e mós iha tinan 2014, empreza ne’e hetan ona projetu tolu ho nia valor kontratu $594,674.02, no tuir fali mai hetan tan projetu ida iha tinan 2017 ho valor kontratu $736.00. Total osan husi projetu sira husi 2014 to’o 2021 ne’ebé fó sai iha portal aprovisionamentu ne’e hamutuk $641,302.77.
Lista projetu hirak ne’e la’os segredu ona, tanba públiku bele asesu iha Timor-Leste eProcurement Portal.
Tuir portal Institutu Apoiu ba Dezenvolvimentu Empresarial (IADE) rejista kompañia Irmão Timor Unipesoal, Lda hala’o ninia atividade negósiu iha setor automotive, konstrusaun no renovasaun ho nia subsetor sira maka iha área faan kareta, no aluga inklui fornese jeral ba konstrusaun.
Iha tinan 2016, empreza Irmão Timor mós hetan projetu halo eskola ka EBF Naimeko Sikalote husi autoridade RAEOA ne’ebé hahu asina kontratu iha loron 10 Novembru 2016 no remata projetu konstrusaun eskola ne’e tuir kontratu tenke remata iha iha loron 10 Marsu 2017 ho nia valor kontratu $ 65,221,01. No nia kaben Iche ka Ivonella Hede mós nu’udar nain ba kompañia Terra Santa Unipessoal, Lda hetan projetu halo eskola EBF. Mouzinho Lalisuk-Padiae, Pante Makassar ne’ebé hahu asina kontratu iha loron 10 Novembru 2016 no tuir kontratu tenke remata iha loron 10 Marsu 2017, maibé ikus mai foin remata iha loron 10 Maiu 2017. Projetu eskola ne’e inagura husi eis Prezidente Autoridade ba RAEOA, Mari Alkatiri ho nain ba empreza Terrsa Santa Unipesoal, Lda.
Empreza Irmão Timor mós hetan projetu gabiaun iha parte Aenmat ho nia medida naruk metru rihun ida atus rua (1200) profundu metru tolu (3) ho durasaun serbisu fulan ha’at (4) ho valor kontratu $ 247, 620.31 USD, hetan mós projetu seluk tan, inklui projetu ne’ebé boot liu maka liu husi nia loja 21 de Junho hetan projetu Cesta Básica ne’ebé tuir informasaun TOP asesu katak, hetan lukru kuaje millaun $ 3 USD.
Tuir informasaun katak, Julio Mak alias Bee Kheong Mak hahu nia atividade negósiu husi loja 21 de Junho ne’ebé maka fa’an de’it nesesidade báziku sira hodi responde ba konsumedor sira iha Oe-Kusi Ambeno, tuir fali mai mós loke tan negósiu iha parte transporte rai-maran nian hanesan fa’an billete Tour & Travel Paradise, iha mós estasaun kombustivel ida ne’ebé lokaliza kedas iha nia loja 21 de Junho nia sorin, no oras ne’e mós hahu halo ona estasaun kombustivel ne’ebé seidauk remata.
Maske mosu keixa ida husi sidadaun ida ne’ebé minimiza nia kapasidade finanseira seidauk boot, maibé haree husi lista atividade negósiu hirak ne’e, hatudu empreza Irmão Timor Unipessoal, Lda oras ne’e iha ona kapasidade finanseira ne’ebé sufisiente hodi bele haluan tan ninia atividade negósiu iha setor seluk.
Tanba sente iha ona kapasidade finanseiru ne’ebé sufisiente, Julio Mak alias Bee Kheong Mak oras ne’e planeia ona atu loke tan ninia atividade negósiu iha área transporte maritima nian liu-liu hatudu ona nia vontade atu sosa ro SUCCESS ne’ebé tuir planu sei mai Timor-Leste iha tempu badak.
Ninia vontade atu haluan tan nia atividade negósiu iha área transporte maritima ne’e maka hatudu liu husi ninia karta ida ho númeru referensia: 11/IT/IX/2021 ho lian Ingles ne’ebé haruka ba Xefe Kompañia Marine Enterprise, Sdn. Bdh iha loron 13 Setembru 2021. Karta ne’e ho nia pedidu atu halo koresaun ba karta uluk nian ne’ebé haruka ona iha loron 10 Setembru 2021.
Iha fulan Jullu no Setembru tinan ida ne’e, kompañia Irmão Timor Unipessoal, Lda aprezenta proposta ida hakarak sosa ro SUCCESS. Hafoin simu karta ne’e, ro SUCCESS nia-nain oferese folin ba kompañia Irmão Timor ho montante $1,800.000.00 USD, um milão e oito centos mil dolar americano ho kondisaun ida katak, tenki depozita uluk osan ho montante $ 500.000.00 USD, quinentos mill dolar americano, no osan restu sei halo pagamentu bainhira halo manutensaun no hadia hotu iha Malaysia.
The Oe-Kusi Post (TOP) esforsu ona kontaktu diretor empreza Irmão Timor Unipesoal, Lda, Julio Mak hodi esplika kona-ba asuntu ne’e liliu kona-ba keixa ne’ebé kontra nia ne’ebé oras ne’e iha ona investigador KAK sira nia liman, maibé Julio Mak lahatudu vontade di’ak hodi halo esplikasaun ho klean, no promete sei lori media online rua, The Oe-Kusi Post (TOP) ho SMNews ba Tribunal, tanba konsidera publikasaun media online rua ne’e kona-ba prosesu negosiasaun atu sosa ro SUCCESS ne’e halo defamasaun hasoru nia.
Notisia relevante: Deskonfia futu-lia atu sosa ro SUCCESS, FONGTIL no KAK simu ona keixa ida
