DILI (TOP) – Diretor kompañia Irmão Timor Unipesoal, Lda, Julio Mak alias Bee Kheong Mak rejeita total transfere osan ba ro SUCCESS ne’ebé oras ne’e sei hala’o hela prosesu manutensaun iha Malaysia, no konsidera mós deklarasaun husi Sansão Gomes nian ne'e sala hotu.
Antes ne’e responsavel Kompañia Versado Shipping Lda, Sansão Gomes klarifika, prosesu ro SUCCESS iha ona tranzassaun entre kompañia Irmão Timor Unipesoal, Lda husi Oe-Kusi Ambeno ho parseiru sira iha Malaysia.
São Gomes hatutan, antes ne’e kompañia Versado maka serbisu hamutuk ho parseiru sira hodi fasilita ro SUCCESS mai Timor-Leste hodi apoia konektividade transporte maritima nian.
“Ami rona ne’e Kompaña Irmão Timor mak hakerek karta ba parseiru sira hodi hola Ro’o Success no deposita ona osan dolares amerikanu rihun atus lima (500.000.00). Ami hanoin Kompañia Irmão Timor mesak hola tuir karta ne’ebe hakerek, maibe ikus fali iha loron, 20 Novembro 2021, rona Presidente Autoridade RAEOA, Arsenio Bano ko'alia iha publiku, entaun ami foin hatene ema sosa ne’e la’ós Irmão Timor, maibé parese autoridade RAEOA-ZEESM mós hakarak inzeta osan bá partisipa iha empreza hodi sosa ro ne’e,” esplika Sansão.
Nia dehan, ro SUCCESS fa’an ho orsamentu $ 1,8 miloens, no Kompañia Irmão Timor deposita ona $ 500.000.00 USD.
“Fa’an duni mais ita bele dehan katak, seidauk finaliza 100% tanba seidauk halo pagamentu final, ne’ebé ita labele dehan fa’an ona, entermus legál kuandu fa’an ona signifika, ita entrega osan, sasán entrega ona,” São Gomes afirma.
Nia hatutan, tuir akordu Kompañia Irmão Timor sei finaliza pagamentu ikus ho montante $ 1,3 miloens iha loron 30 Novembru 2021.
Nu’udar responsavel ba Kompañia Versado Shipping ne’ebe antes ne’e jere ro SUCCESS submete ona karta ba iha Ministériu Transporte no Telekomunikasaun katak, laiha ona responsabilidade bainhira ro SUCCESS fila mai Timor-Leste.
“Ami nia parte halo tiha ona karta bá autoridade sira Ministériu Transporte, Portuáriu katak, agora mai oin laiha ona responsabilidade bá Ró Ahi Success, sé karik aban bainrua ró ne’e fila fali mai, tanba ne’e partensia ona ba kompañia selu. Kompañia ami-nian nafatin kontinua funsiona, ami sei lori ro barco rápido antes Natál ho tinan foun para apoiu hodi fasilita viajen pasajeiru Dili-Ataúro no Oe-Kusi Ambeno,” katak Sansão.
Maibé, diretor kompañia Irmão Timor Unipesoal, Lda, Julio Mak konsidera deklarasaun Sansão Gomes ne’e la loos hotu kedas maske iha ona karta korespondensia ne’ebé konsege nakfakar sai ona ba públiku kona-ba prosesu negosiasaun atu sosa ro SUCCESS ne’e.
“São Gomes ninia ko’alia ne’e sala hotu, maibé laiha buat ida, ita boot sira fiar nia laiha buat ida,” Julio Mak alias Bee Kheong Makho lian-maka’as esplika via kontaktu telemovél ba The Oe-Kusi Post (TOP) foin lalais.
“Ha’u sei klarifika to’o ha’u hasoru ha’u nia advogadu lai maka ha’u foin klarifika, ha’u lakohi ko’alia arbiru,” afirma Julio Mak.
Maske Julio Mak rejeita total deklarasaun husi Sansão Gomes, maibé lakohi rejeita deklarasaun husi Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão ne’ebé iha loron 19 Novembru 2021 deklara ona ba públiku katak, autoridade RAEOA sei halo sosiu hamutuk ho empreza Irmão Timor atu sosa tiha ro SUCCESS ne’e.
“Informa ba Primeiru-Ministru kona-ba transporte marítima, tanba agora transporte laiha, maibé molok tama loron boot natal no tinan foun, iha ona empreza ida iha RAEOA liuhosi empreza públika no privada komersiál ba dezenvolvimentu, tama hanesan sosiu, ne’ebé empreza ne’e ema Oe-Kusi-oan duni no nia mak sosa,” hateten Arsenio Bano ba jornalista sira hafoin hasoru Primeiru-Ministru, Taur Matan Ruak, iha Palásiu Governu iha Dili, Sesta 19 Novembru 2021.
Prezidente Autoridade ba RAEOA, Arsenio Paixão Bano. Foto TOP.
Maibé, iha loron 09 Dezembru 2021, Bano deklara fali dehan, nia la involve ida iha prosesu sosa ro SUCCESS ne’e.
Bano ho lian maka’as, rejeita informasaun kona-ba ninia partisipasaun iha negosiasaun ho Kompañia Irmaun Timor atu sosa ro SUCCESS ne’e.
“Agora dadaun ne’e negosiasaun la’o makaas loos entre sosiedade komersial husi Oe-Kusi ho Kompañia Irmaun Timor, no ha’u haree iha ema balun dúvida fali kona-ba ha’u nia partisipasaun ekonomika, tanba ne’e ha’u atu dehan de’it katak, ami Prezidente Autoridade RAEOA la iha interese atu partisipa iha negosiasaun hola ro ne’e, no ami so iha interese ida de’it katak, ro ne’e tenke iha para bele fasilita populasaun RAEOA,” katak Bano ba jornalista sira iha Parlamentu Nasionál, Kinta, 09 Dezembru 2021.
Bano hatutan, bainhira prosesu negosiasaun hetan ona rezultadu atu sosa maka sosiedade komersial ne’ebé reprezenta Prezidente Autoridade RAEOA nia partisipasaun 30% no emprezariu Oe-Kusi oan nian maka 70%.
Patraun Julio Mak hakarak tebes prosesu negosiasaun no tranzasaun atu sosa ro SUCCESS ne’e tenke taka metin, tenke segredu ho intensaun atu fó surpreza ba povu Oe-Kusi Ambeno, maibé ninia hakarak ne’e oras ne’e la’os segredu ona, tanba ninia karta korespondensia ne’e lekar sai ona ba públiku, no ema barak mós hatene ona katak, nia maka sei sosa duni ro ne’e, maibé nia sei kontinua hakarak atu assuntu ne’e tenke taka metin ba públiku.
Karta korespondensia entre kompañia Irmão Timor ho Marino Entreprise.
Julio Mak mós ho lian maka’as hodi konsidera sidadaun ne’ebé hatama keixa kontra nia iha KAK ne’e, tanba laran moras.
“Ai ne’ebé ha’u la tauk ida maun. Laiha, mas maka ne’e, ita sei hasoru malu maka ne’e. Agora ha’u prepara advogadu para ita prepara para ita hasoru malu,” komenta Julio Mak.
“Ema ida keixa ha’u ne’e laran moras kona-ba saida nian. Ha’u lebih gosta ema keixa ha’u, maibé hati-hati, tanba orsida ita sei hasoru malu iha Tribunal”.
Entretantu, tuir keixa ne’ebé The Oe-Kusi Post (TOP) asesu, husu ba autroridade kompotente liu-liu KAK tenke loke prosesu investigasaun ba kompañia Irmão Timor nune’e bele deskobre. Husu mós ba KAK atu loke prosesu investigasaun hasoru Presidente Autoridade RAEOA kona-ba razaun saida maka tenki tau osan ba kompañia privadu ida hodi sosa ro SUCCESS, tanba saida maka la uja didiak orsamentu ne’ebé aloka ba RAEOA-ZEESM-TL hodi rezolve lalais tiha problema ro ahi HAKSOLOK ne’ebé kuaje tinan lima ona seidauk to’o mai Timor Leste.
Keixa ne’e mós ezije no rekomenda ba KAK atu halo kordenasaun ho Ministério Finansas liu-liu Diresaun Impostu no Tributária nian, no mós parte freebalance atu detekta rendimentu husi kompañia Irmão Timor ho razaun atu buka tuir osan deposit nia verdadeiru mai husi ne’ebé?
Komisariu KAK, Sergio Hornai deklara ona, KAK simu tiha ona keixa ne’e no oras ne’e dadauk sei iha hela prosesu investigasaun preliminariu.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
