DILI (TOP) – Prezidente Federasaun Futeból Timor Leste (FFTL) atual Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, re-eleitu ba prezidente FFTL períodu 2022-2026.
Francisco Jeronimo re-eleitu ba kargu ne’e ho votu 11, no nia adversariu Nilton Gusmão hetan de’it votu 10 liu-husi votasaun iha ronde daruak kongresu FFTL ba da-hitu iha Otél Novo Turismo, Dili, Sábadu 26 Fevereiru 2022.
Hafoin re-eleitu ba prezidente FFTL periodu 2019-2022, Francisco Jeronimo afirma kedas iha nia diskursu katak nia iha vontade maka’as atu dezenvolve futeból hamutuk ho organizasaun membru sira sai ‘icon’ desportu iha Timor-Leste.
Liu-husi publikasaun pájina FFTL iha loron 27 Jullu 2021, nia mós hakarak iha nia lideransa ne’e sei lori futeból to’o ba iha munisípiu no postu administrativu sira iha teritoriu nasional. Francisco Jeronimo nia ambisaun di’ak ne’ene’e kontempla mós iha planu FFTL 2019-2022.
“Ita hotu hakarak atu dezenvolve futeból. Ita hotu hakarak atu futeból sai duni icon [desportu] ba timoroan hotu. Bainhira simu kna’ar nu’udar prezidente FFTL, ha’u afirma kedas katak hakarak lori futeból ba territóriu tomak. No hakarak nafatin atu kontinua lori futeból ba iha territóriu tomak. Nune’e futeból la’ós ema sente de’it iha sidade Dili, maibé mós to’o ba iha sidade munisipál sira,” Francisco Jerónimo hateten iha tempu liuba.
Iha ninia lideransa Jerónimo hakarak realiza futeból ne’ebé profisionál ba povu Timor-Leste. Votante ida ne’e hatudu iha programa sira ne’ebé realiza durante ne’e, FFTL halo esforsu maka’as hodi dezenvolve rekursu umanu hahú husi treinadór, árbitru no mós ba match commissioner ne’ebé realiza iha Fevereiru 2021, ho forma virtuál. Formasaun ba match commissioner hatudu loloos vontade atu organiza kompetisaun futeból ho profisionál iha futuru.
Futebol Timor-Leste atu mout dadauk ona
Liga ba ambisaun Francisco Jeronimo nian iha leten ikus mai sai kontrariu maka’as ho realidade balun ne’ebé durante ne’e akontese iha terenu.
Prezidente FFTL ne’e kaben boot no kaben nasulin tebes atu dezenvolve futebol iha rai-laran no rai-liur, maibé tuir informasaun balun ne’ebé The Oe-Kusi Post (TOP) asesu, kuaje fulan 10 ona FFTL seidauk selu jogador selesaun nasionál sira nia direitu, no a’at liutan deve mós treinador selesaun nasionál Fabio Joaquim Marcial da Silva durante fulan 5 ona.
Notisia relevante: Pelatih Timor-Leste mundur jelang piala AFF, gaji tak dibayar 5 bulan
Hafoin informasaun kona-ba seidauk selu treinador selesaun nasionál naklekar bai ha públiku, rona katak FFTL foin hahu selu ona, maibé selu ho sistema cicilan. Tanba FFTL sai devedor, ikus mai treinador Fabio ne’e tenke rezigna aan tiha, no treinador ida husi Malazia mós tenke fila ona ba nia rain, tanba seidauk hetan pagamentu.
Prezidente FFTL, Francisco Jeronimo la’os hasusar no haterus de’it jogador nasionál sira iha rai-laran, maibé mós hamonu no hamoe imajen futebol Timor-Leste nian iha mundu internasional hanesan atraza selu treinador selesaun nasional sira husi Brazil, no Malazia.
Nasaun seluk jere sira nia federasaun futebol la’o di’ak, maibé Francisco Jeronimo ho nia membru estrutura FFTL nian jere futebol iha Timor-Leste to’o liga sira mós paradu hotu, no halo moe tan nasaun iha komunidade internasional.
Ijemplu ida mak FFTL rasik mak kansela tiha viajen selesaun nasionál Timor-Leste sub-16. iha jogu kualifiksaun AFC U17, iha Bahrain 2023, tanba billete karun liu no FFTL la iha osan hodi sosa billete ba jogador sira.
Eventu ne’e rasik dada ona sorteu iha ne’ebé Timor-Leste iha grupu (H) hamutuk ho nasaun 3 seluk hanesan Tajikistan, Afghanistan, Mongolia no Timor-Leste rasik.
Ho núne’e selaun Nasional Timor-Leste U17 hala’o ona perparasaun masimu hodi reprezenta Timor-Leste iha jogu AFC U17 ne’e maibé infelismente FFTL kansela tiha sira nia viajen ho rajaun tanba billete mak karun liu.
Notisia relevante: Billete karun FFTL kancela viajen selesaun nasionál U-16
Situasaun hirak ne’e hatudu, prestasaun serbisu Francisco Jeronimo nu’udar Prezidente FFTL la’os atu haburas atividade futebol, maibé atu hamout dadauk ona ba tasi-laran. Tanba, Liga Futeból Timorense Époka 2022-2023 ne’ebé tuir loloos tenke hala’o ona iha tempu hirak liuba, maibé faktu hatudu to’o ohin loron seidauk bele realiza tanba fundu ne’ebé aloka hosi Governu liuhosi SEJD ho montante $200,000, fundu hosi FFTL mós $200,000, inklui LFTL rasik prepara $131,530 la sufisiente atu bele organiza Liga Futeból Timorense Époka 2022-2023.
FFTL iha Francisco Kalbuadi Lay nia tempu laiha falansu muito menus Timor-Leste nia partisipasaun iha enventu internasional sira sempre iha hela de’it. Timor-Leste sempre enfenta iha jogu mundial sira ho klarifikasaun oioin. Mezmu la hatudu prestasaun tuir públiku ka bola mania Timor sira nia espetativa maibé, FFTL iha tempu ne’eba sempre partisipa ativu iha eventu internasional sira.
FFTL iha Francisco Jeronimo nia lideransa, laiha “transparensia” ba orsamentu sira hosi AFC ho FIFA kada tinan. A’at liu tan, tuir fontes sira iha FFTL katak, auditoria ne’ebé FIFA halo foin lalais ne’e hatudu, iha “mal gastu” ba orsamentu FFTL Nian.
Tinan ida ne’e FIFA ho AFC hamenus osan ba federasaun hotu-hotu ne’ebé ramu ba FIFA tanba iha krize mundial. Maibé, ba FFTL hamenus to’o hakdasak la’o la di’ak ona tanba deskunfia iha “mal gastu”.
Nune’e jogador sira nia osan mós seidauk selu inklui treinador Brazileiru nia osan mos la selu ka selu itoan-itoan.
Kazu seluk mak Prezidente FFTL ne’e deskonfia komete korupsaun kona-ba instalasaun projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P), ne’ebé CAC mós deskobre katak iha indísiu fó prejuizu bá Estadu, ne’ebé oras ne’e iha ona prokurador titular nia liman.
Notisia relevante: Kazu projetu instalasaun Set Top Box RTTL,E.P PGR simu ona relatoriu investigasaun husi CAC
Atu salva futebol Timor-Leste, tuir loloos Prezidente FFTL, Francisco Jeronimo tenke rezignaan tiha de’it hodi fó biban ba ema seluk lidera instituisaun ne’e atu nune’e bele hamorin hikas imajen Timor-Leste nian iha mundu internasional, no haburas hikas atividade futebol iha rai-laran.
