BIHALA (TOP) – Prezidente Autoridade ba Rejiaun Administrativa Espesial Oe-Kusi Ambeno (RAEOA), Arsenio Paixão Bano susesu no konsege lohi Primeiru-Ministru (PM), Taur Matan Ruak ne’ebé tuir loloos ba atu lansa projetu estrada nasionál ida, maibé ba ko’a fali fita ba estrada pedasuk ida ne’ebé uja de’it simentu, la’os alkatraun.
Antes ne’e Bano anunsia ba públiku katak, nia sei konvida PM Taur ba lansa projetu estrada boot ida husi eis merkadu Tono ba to’o Oe-Silo, maibé tanba empreza Indonézia sira halo reklamasaun ba malu kona-ba projetu ne’e, ikus mai Bano dirije PM Taur ba inagura de’it projetu estrada rural ida husi Bihala iha suku Bobokase ba to’o Kutet.
Bano rekoñese nia asaun lohi ne’e katak, tuir loloos PM Taur tenke halo lansamentu ba projetu nasionál, la’os ba inagura fali projetu estrada urbana ida ne’ebé a’at liutan la’os uja alkatraun, maibé uja de’it simentu.
PM Taur inagura estrada pedasuk ne'e iha aldeia Bihala, suku Bobokase iha loron Domingu 27 Novembru 2022./Net.
“Tuir loloos ohin Primeiru Ministru atu halo lansamentu ba estrada nasionál projetu estrada husi sub-rejiaun Pante Makasar liga ba sub-rejiaun Oésilo, iha prosesu ami fó sai avizu, informa ba públiku katak, empreza PT.Hutama Karya mak sai manán na’in ba projetu ne’e, konkorente ida seluk PT.Waskita Karya halo reklamasaun,” Bano hateten durante nia diskursu iha inaugurasaun projetu reabilitasaun estrada rural iha suku Bobokase sub-rejiaun Pante Makasar, Oe-Kusi Ambeno, Domingo 27 Novembru 2022.
Ho kestaun reklamasaun husi kompañia PT. Waskita Karya mak Autoridade RAEOA deside kansela husu fali ba painél sira atu halo avaliasaun hodi responde ba reklamasaun empreza ninian tuir regra aprovizionamentu ne’ebé mak ein-vigór iha Timor-Leste ho RAEOA nian rasik.
“Entaun ohin Primeiru Ministru lakonsege lansa projetu ne’e, maibé ha’u informa tan katak, kontrusaun estrada nasionál husi Pante Makasar ponte Noefefan liga ba sub-rejiaun Nítibe servisu tékniku la’o daudaun ona, ba pakote I sei to’o Oénunu suku Suni-Ufe ho distánsia kilomentru 16,” Bano informa.
Estrada rural Bihala ba Kutet. Credit: Media RAEOA ZEESM-TL.
Iha loron 05 Novembru ne’e tuir rezultadu avaliasaun husi Unidade Aprovizionamentu RAEOA fó sai katak, empreza internasionál PT. Hutama Karya mak sai manán na’in ba projetu estrada nasionál husi sub-rejiaun Pante Makasar liga ba sub-rejiaun Oe-Silo.
Nune’e valór orsamentu ba projetu estrada nasionál ne’e hamutuk millaun $33,591,867.00 hodi hadia estrada nasionál ne’e husi Pante Makasar suku Cunha to’o fronteira Napan suku Bobometo iha sub-rejiaun Oé-Silo ho distánsia kilometru 18.
Maske nune’e, PM Taur sente kontente nafatin ho situasaun ne’e.
Bano lansa projetu rehabilitasaun estrada rural ne’e iha loron 18 Dezembru 2021 ho objetivu atu fasilita movimentu komunidade sira husi suku Bobokase no Aldeia Kutete hodi asesu ba atividade ekonomia no atividade administrasaun públika nian.
Bano dehan, estrada pedasuk oan ne’e sei benefisia direita ba komunidade Suku Bobokase ho total populasaun 768 ho uma kain 315, no komunidade aldeia Kutete ho total populasaun 618 husi uma kain 135.
Rehabilitasaun estrada pedasuk ne’e ezekuta husi kompañia Lifau Indah Unipessoal Lda ho valor kontratu $ 2.623.959.80 ne’ebé inagura ona iha loron Domingu, 27 Novembru 2022.
Author: João CaunanWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista The Oekusi Post iha Ambeno, Oekusi, RAEOA.
Bandu atu hetan envelope ka sasan ruma husi fontes informasaun sira.
