KUTET (TOP) – Estrada rural iha suku Bobokase ba Kutet ne’ebé inagura ona husi Primeiru-Ministru, Taur Matan Ruak no Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano foin mak halo loron 14 hahu a’at fali ona.
PM Taur ho Bano inagura estrada ne’e ho distansia 14Km husi aldeia Bihala iha suku Bobokase ba to’o Kutet (suku Costa) iha loron Domingu 27 Novembru 2022.
Bano lansa projetu rehabilitasaun estrada rural ne’e iha loron 18 Dezembru 2021 ho objetivu atu fasilita movimentu komunidade sira husi suku Bobokase no Aldeia Kutete hodi asesu ba atividade ekonomia no atividade administrasaun públika nian.
Bano dehan, estrada pedasuk oan ne’e sei benefisia direita ba komunidade Suku Bobokase ho total populasaun 768 ho uma kain 315, no komunidade aldeia Kutete ho total populasaun 618 husi uma kain 135.
Rehabilitasaun estrada pedasuk ne’e ezekuta husi kompañia Lifau Indah Unipessoal Lda ho valor kontratu $ 2.623.959.80.
Xefi aldeia Mahata, Carlos Bana oras ne’e sente triste tebes, tanba governu gasta osan lubuk ida hodi halo estrada ne’e, maibé realidade hatudu inagura foin liu de’it loron 14, estrada ne’e hahu a’at fali ona.
“Estrada ne’e inagura iha semena kotuk, seidauk to’o tinan, maibé ita hare kondisaun estrada dodok fali ona, bee-dalan balun monu hotu ona, entaun ne’e signifika kompañia ne’e serbisu laiha kualidade,” hateten xefi aldeia Mahata, Carlos Bana ba The Oekusi Post (TOP) iha nia Rezidensia Kutet, Sesta 9 Dezembru 2022.
Ho situasaun real ne’e, Bana ezije ba Bano atu husu ba kompañia Lifau Indah tenke halo manutensaun urjente ba estrada ne’e, tanba se la hadia mak iha tempu udan ne’e sei lori hotu ba mota.
“Estrada ida ne’e inagura direta husi Primeiru-Ministru, Taur Matan Ruak iha semana kotuk komesa a’at fali ona, tanba ita haree husi kondisaun rai, balun rai fatuk entaun simentu ne’e metin, maibé rai balun halai, estrada saluran no ponte sira mós aat dadauk ona. Liliu iha fatin ida naran Nenu ne’e estrada aat liu ona,” esplika Carlos Bana.
Iha tempu ne’eba, Bano konsege lalin membro governu lubuk ida hahu husi Primeiru-Ministru, Taur Matan Ruak, Ministru Justisa, Tiago Amaral Sarmento, Ministru ba asuntu Parlamentar no Komunikasaun Sosial (MAPKOMS ), Francisco Jeronimo, inklui deputadu sira husi Komisaun E ne’ebé trata asuntu infraestrutura mak ba halo inagurasaun ba estrada pedasuk ne’e.
