Bano ameasa xefe aldeia Mahata hafoin deklara estrada Bihala-Kutet laiha kualidade

AMBENO (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Babo hahu ameasa ona xefe aldeia Mahata (Kutet), Carlos Bana hafoin konsidera konstrusaun estrada pedasuk ne’ebé foin inagura direta husi Primeiru-Ministru, Taur Matan Ruak iha loron Domingu 27 Novembru foin lalais hahu a’at fali ona.

Notisia relevante: Estrada pedasuk ne’ebé PM Taur ho Bano inagura hahu aat ona

Xefe Aldeia Mahata, Carlos Bano durante entrevista ida ho jornalista sira iha loron Sesta, 9 Dezembru 2022 konsidera estrada rural ho distansia 14Km ne’ebé foin inagura iha semana kotuk hahu a’at fali ona, no hafoin entrevista ne’e sai ba públiku, deskonfia Bano orienta nia funsionariu públiku ida ho naran José Bana halo kontaktu telemovel ba xefe aldeia ne’e nakonu ho ameasa katak, sei hasai (ezonera) nia husi kargu xefe aldeia Mahata.

Estrada rural ne'e foin mak inagura iha loron Domingu 27 Novembru liuba, maibé hahu aat fali ona. Foto TOP/João Caunan.

Iha nasaun demokrátiku, povu mak soberanu, povu mak iha poder hodi hili ukun nain sira liu husi eleisaun demokrátiku no justu, no lider komunitariu sira hanesan xefe suku no xefe aldeia sira ne’e pakote ida de’it hili diretamente husi povu, la’os hili husi Prezidente Autoridade ka Primeiru-Ministru. Tenke hatene katak, iha nasaun demokrátiku ne’e povu mak iha poder, no poder ne’e mai husi povu, tanba ne’e Prezidente Autoridade RAEOA laiha rajaun, no laiha baze legal hodi hasai xefe aldeia ida ka xefe suku ida iha Ambeno bainhira hato’o kritika ba nia politika públiku sira ne’ebé la favorese ba povu hanesan estrada pedasuk ne’ebé inagura ona iha loron Domingu 27 Novembru 2022.

Arsenio Bano la fo oin ba PM Taur bainhira hasoru malu iha Oe-Kusi Ambeno./Net.

Konstituisaun RDTL iha artigu Artigu 40 ko’alia no garante kona-ba liberdade ko’alia no informasaun ninian katak, ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian, no liberdade ko’alia no informasaun ninian labele hetan limitasaun hosi sensura ruma. Maibé, saida mak akontese iha Ambeno ne’e, Bano hatudu kleur ona nia atitude ukun ditadura hodi bandu no ameasa povu Ambeno sira labele lansa kritika hasoru nia kona-ba prosesu dezenvolvimentu iha rai-ketan Oe-Kusi Ambeno. Ho atitude ukun ditadura ne’e mak FRETILIN durante tinan barak nunka manan eleisaun iha Oe-Kusi Ambeno ne’e.

“Sabadu loraik kedas sira telefone mai ha’u nakonu ho ameasa mai ha’u, no sira nia hakarak ne’e ha’u labele kritika autoridade kona-ba konstrusaun estrada ne’e maske laiha kualidade mós sira hakarak ha’u labele Kritika sira,” hateten Carlos Bana ba jornalista sira foin lalais.

Estrada ligasaun husi Bihala ba Kutet. Foto TOP/João Caunan.

“Kuandu governu halo projetu infraestrutura iha ha’u nia aldeia laran mak la di’ak, laiha kualidade ha’u sei ko’alia nafatin, tanba governu atu gasta povu nia osan ne’e tenke gasta ho didi’ak ba povu, la’os gasta arbiru de’it,” Carlos Bana afirma.

Notisia relevante: Bano ho PM Taur hamutuk inagura ona estrada pedasuk ida iha Bihala

Iha konversa telemovel ne’e, José Bana (FRETILIN) husu ba xefe aldeia Carlos Bana atu tenke ba aprezenta aan iha Prezidente Autoridade ba RAEOA nia serbisu fatin iha loron Segunda 12 Dezembru 2022 ho rajaun la klaru.

Rehabilitasaun estrada ne'e seidauk hotu, maibé PM Taur ho Bano ansi loos hodi inagura tiha ona iha loron Domingu 27 Novembru 2022. Foto TOP/João Caunan.

“Sira ameasa ha’u, sira hanoin ha’u tauk karik. Ha’u la tauk ida. Uluk iha 1999 hasoru milisia sira mós ha’u la tauk ona, no agora ha’u sei moris hela, sa tan agora iha tempu uku naan mak mai ameasa fali ha’u ne’e, ha’u la tauk liu,” hateten Carlos Bana.

Author: João CaunanWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

Jornalista