TONO (TOP) – Komunidade sira iha Nusla’o no Nunu-Henu tinan ida ne’e simu tinan foun 2023 ho laran susar, tanba tenke lakon sira nia hela fatin no riku soin uma laran nian basa sobu no hoban husi mota Tono ne’ebé si’ak tebes.
Tuir informasaun ne’ebé The Oe-Kusi Post (TOP) asesu, udan boot ne’ebé akontese iha loron Sesta, 30 Dezembru 2022 konsege estraga uma kain hamutuk 33 iha Oe-Kusi Ambeno. Udan ne’e mós estraga natar hektar lubuk ida inklui estrada públiku balun.
Husi uma kain 33 ne’ebé provizoriu sai afetadu mak kompostu husi uma kain 11 iha bairo Nuslao, aldeia Bihala, suku Bobokase, uma kain 8 iha aldeia Oe-Baha, suku Bobometo (uma kain 3 iha Paut, no uma kain 5 iha eskola filial nia kotuk). Uma kain 2 iha Samoro, suku Costa, uma kain 10 iha Nunu-Henu, uma kain ida iha Baki – Kua-Fe’u, suku Naimeko.
TOP observa uma kain 11 iha Nuslao no uma kain 10 iha Nunu-Henu mak afeta maka’as husi barajen Tono, tanba mota-been tun husi foho la halai liu tun ba tasi, maibé halai sa’e fali hodi hoban tiha uma kain hirak ne’e.
Komunidade sira husi fatin rua ne’e hato’o bebeik ona sira nia preokupasaun ba governu lokal autoridade Rejiaun Administrativu Espesial Oe-Kusi Ambeno (RAEOA) desde tinan 2021 hodi buka solusaun ba barajen Tono ne’ebé mak sempre provoka inundasaun iha tempu udan, maibé to’o oras ne’e seidauk iha solusaun hodi kontinua estraga tan populasaun sira nia hela fatin no natar.
