COVID-19: Ema Nain 679 Rezultadu Teste Negativu

Oekusipost.com Dili – Dadus kona-ba moras virus corona (COVID-19) iha rai-laran oras ne’e iha ema nain 679 mak sira nia rezultadu teste laboratóriu hatudu negativu, no iha ema hamutuk nain 21 mak di’ak fali ona hafoin hetan tratamentu intensivu iha sala izolamentu iha Sentru Saúde Vera Cruz, Dili.

Koordenadora Ofisiál Ligasaun Forsa-Tarefa no Porta-vóz Sala Situasaun Sentru Integradu ba Jestaun Krize, dotora Odete da Silva Viegas hateten, total númeru kumulativu teste hamutuk nain 764, númeru hein rezultadu iha nain 61, no kazu konfirmadu nafatin nain 24. Kazu foun ohin laiha.





“Total rezultadu teste laboratóriu negativu iha nain 679. No nain 21 mak di’ak tiha ona,” hateten dotora Odete liu husi konferénsia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Kinta 7 Maiu 2020.

Nia hatutan, sei iha ema hamutuk nain 7 mak oras ne’e baixa hela iha Sentru Saúde Vera Cruz, Dili. Total profisional saúde ne’ebé oras ne’e sei hela iha kuarentena nafatin ema nain 40, no total ema tama kuarentena obrigatóriu hamutuk nain 123 ne’ebé fahe ba Dili iha nain 89, no nain 34 iha munisipiu sira. Total auto-kuarentena iha Dili laiha, maibé faktu hatudu iha Kuarta horseik Arsenio Paixão Bano hafoin tun husi aviaun husi Austrália direitamente ba hela iha nia uma. Auto-kuarentena iha munisipiu sira hamutuk ema nain 32.

Ema hamutuk nain 2077 mak liu ona loron 14 ne’ebé husi Dili iha nain 1639, iha munisipiu hamutuk nain 438.

Maske númeru kazu COVID-19 iha rai-laran hahu iha mudansa di’ak, maibé dotora Odete nafatin husu ba sidadaun sira iha rai-laran atu kontinua mantein distansia fiziku, distansia sosial, nafatin mantein hijiene pessoal liu husi fase liman bebeik ho sabaun, uja máskara bainhira sai ba liur, evita halibur malu, no karik mosu sintomas ruma ba moras COVID-19 favór tenke kontaktu ba númeru 119 hodi hetan atendimentu lais ka bele mós hakbesik a’an ba fasilidade saúde sira ne’ebé besik ita boot sira nia hela fatin.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE