KAK “hafuhu” hela distribuisaun Cesta Bázika

DILI (TOP) — Komisaun ba Anti-Korupsaun (KAK) oras ne’e hafuhu tutuir hela prosesu distribuisaun ai-han (Cesta Bázika) iha rai-laran.

Komisariu Komisaun Anti Korupsaun (KAK) Sergío Hornai hateten, haruka ona ekipa tékniku atu akompaña “presu” cesta bázika, no ekipa ne’e oras ne’e akompaña hela folin sasan sira ne’ebé iha tendensia lahanesan ho nia folin orijinal.

“Orsida com certeza iha ekipa tékniku ida iha ne’ebá, para atu halo klean iha ne’ebá oinsa maka produtu sira ne’e la priense rekezitu sira ne’e,” hateten komisariu KAK ba jornalista sira hafoin remata audiensia ho komisaun A kona-ba OJE 2021 iha Parlamentu Nasionál, Sesta 13 Novembru 2020.

“Ita boot sira hare katak ita halo hela vijilansia iha primeiru hahu halo lansamentu to’o mai distribuisaun, ita halo observasaun mós ba iha lei sira, to’o mai iha distribuisaun sira, to’o benefisiariu sira ne’e loos ka la’e tuir ita nia lei sira ne’e,” nia hakotu.

Governu tomak halo ona lansamentu ba programa ne’e iha loron Tersa 27 Outubru liuba iha suku Sabuli, postu administrativu Metinaro, munisipiu Dili.

Lansamentu ne’e husi Vise Primeiru-Ministru no Ministru Planu no Ordenamentu, José Maria dos Reis no Ministru Turizmu, Komérsiu no Industria, José do Carmo da Silva, membru governu balun, autoridade lokál Metinaro, parseiru dezenvolvimentu, setór privadu, inklui komunidade.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan, maibé tuir informasaun balun ne’ebé iha katak sasan sira ne’ebé durante ne’e governu fahe ba povu, ema ida hetan de’it sasan sira ho total folin $16.50 centavos.

Husi total ne’e hatudu osan sei resin hela, maibé seidauk hatene osan ne’e ba iha ne’ebé no ba iha se nia liman ka nia bolsu. KAK sei hafuhu hela.

Governu sei implementa medida ha’at ho kustu totál millaun $113,4, ba tempu badak hanaran mitigasaun impaktu ekonómiku no sosiál ba krize Covid-19, ho nia objetivu maka atu haree ba postu traballu ezistente antes krize no rekopera rendimentu família liu husi hadia empregu no apoiu direitu sidadaun no empreza iha merkadu inklui normaliza fali atividade ekonómika. 

Medida ha’at ne’e, inklui hotu ho Cesta Bázika ba família, ho totál kustu ba implementasaun maka millaun $71,5 ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál. Maibé, mosu lamentasaun barak iha públiku kona-ba programa ne’e, tanba deskonfia habosu no sei habokur de’it grupu emprezariu balun, la’os emprezariu hotu.

Hafoin mosu lamentasaun barak iha públiku kona-ba folin sasan sira la to’o valor osan $25, Ministru Koordenadór ba asuntu Ekonómiku (MKAE), Joaquim Amaral husu ba povu atu komprende de’it, maibé iha loron 11 Novembru liuba, Ministru ne’e hahu dehan fali folin produtu sira iha programa Cesta Bázika tuir duni folin merkadu nian, no rejista folin sasan sira ne’e la to’o valor osan $25.



Cesta Bázika governu ho asaun karitativa Kay Rala Xanana Gusmão

The Oe-Kusi Post (TOP) observa, programa Cesta Bázika ne’ebé domina husi membru governu sira mai husi partidu FRETILIN ne’e uja osan Estadu nian, no sira ne’ebé tun ba fahe ba povu mós hetan osan per diem hotu, maibé asaun karitativa ne’ebé hala’o husi eis Primeiru-Ministru Kay Rala Xanana Gusmão desde Abril to’o ohin loron hetan kontribuisaun husi ema individual sira, la’os uja osan Estadu nian, no asaun karitativa ne’e mós nia kuantidade boot liu fali programa Cesta Báziku.

Lider Karismátiku Kay Rala Xanana Gusmão hala'o asaun karitativa iha postu Fatumea, Kovalima. Nesesidade báziku oferese husi Fatumean ida, la'os uja osan Estadu maka sosa. Foto TOP.
Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE