DILI (TOP) – Xefe bankada partidu CNRT, deputadu Duarte Nunes katak, CNRT sei fó apoiu total ba governu foun no apoiu mós asaun partidu tolu hodi halo destituisaun ba Prezidente Parlamentu Nasionál (PPN) bainhira tuir dalan legal.
"Koaligasaun ne'ebé mak fó apoiu ba governu foun mosu ne'e formatu, tuir dalan legal ne'e laiha Problema ona. Ita aserta data para depois halo eleisaun, no se mak manan, ka’er liman entrega fila-fali buat hotu di’ak," hateten deputadu Duarte ba jornalista sira iha bankada CNRT iha Parlamentu Nasionál (PN), Dili Kuarta 13 Maiu 2020.
“Agora ida mai ameasa ita tun sa'e dehan atu troka meza ne'e oinsa, hasoru malu kalan ida bainrua troka Meza Parlamentu Nasional ne'e buat ida lalojiku. Bankada FRETILIN, PLP no KHUNTO tenke legaliza lai, ida-idak tenke halo konferénsia depois tenke iha intendimentu ida, iha akordu apoiu por eskrita ida para ema hotu fiar katak sira ne'e la nakfera iha loron rua nia laran, ne'e para Prezidente Parlamentu Nasional mós bele fiar," afirma deputadu Duarte.
Deputadu CNRT ne’e esplika, fasil tebes atu halo destituisaun ba PPN ho nia estrutura meja, maibé tenke liu husi asaun legal, la’ós liu husi asaun lalojiku.
"Labele ita obriga malu, ita dada malu hakarak troka Meza Prezidente Parlamentu Nasional. Ilegal ka la’e, ha’u lahatete ilegal, maibé tenke formaliza, tenke formal hatudu ba ema hotu katak ami hamutuk ona, ami nia komprimisiu ba ida ne'e, no ida ne'ebá," nia fó hanoin.
Nia hatutan, antes ne’e mós Primeiru-Ministru, Taur Matan Ruak sumbete ona lista membru governu foun husi partidu rua ba Prezidente Repúblika atual Prezidente Partidu FRETILIN, Francisco Guterres Lú Olo hodi fó posse, maibé to’o oras ne’e seidauk akontese hela de’it. Partidu rua ne’e mak, nain 5 husi partidu FRETILIN, no nain ida husi Partidu Demokrátiku (PD).
"Iha legal ona ami bankada CNRT prontu fó apoiu hodi marka data eleisaun ba ba estrutura PN, no se mak manan ita hotu hamrik basa liman no fó parabéns buat hotu la’o di’ak ona”.
Partidu 3 (PLP, FRETILIN no KHUNTO) ne’ebé “lahalo” koaligasaun, deputadu Duarte konsidera sira hanesan obriga a’an de’it atu ka’er ukun.
"Agora lor-loron ita hanesan be teror tun-sa'e, ko’alia arbiru de’it, nasaun ne'e la presiza buat sira ne'e, ita tuir regras, ita entrega ba malu buat hotu di’ak, ita haree malu di’ak, ita ka’er liman ba malu buat hotu di’ak".
Entretantu, kona-bá destituisaun ba PPN ho meja V Lejislatura, partidu tolu hatama tan ona pedidu destituisaun ba daruak nian, no ultimatu pedidiu destituisaun dahuluk nian invalidu tiha ona, no promesa vise xefe bankada PLP, Francisco de Vasconcelos atu “obriga” hodi halo destituisaun ba PPN ne’e mós seidauk akontese.
