DILI (TOP) – Pontu ida ne’ebé rekere husi partidu tolu ba destituisaun katak Prezidente Parlamentu Nasionál (PPN), Arão Noe de Jesus Amaral fó tiha votus afavór ba Estadu emerjénsia iha reuniaun Konsellu Estadu nian iha Palásiu Prezidensial, maibé vota kontra fali iha Parlamentu Nasionál ne’e la loos, tanba fó opiniaun de’it, la’ós halo votasaun.
Assuntu ne’e mós Vise Xefe bankada PLP, Franciso de Vasconcelos kontinua levanta no kestiona tan bainhira sai panelista ida iha programa Grande Intervista iha GMN TV iha loron Segunda kala n 11 Maiu 2020.
Maibé, PPN Arão klarifika katak, iha tempu ne’eba membru Konsellu Estadu sira fó de’it sira nia opiniaun, la’ós halo votasaun.
“Atu klarifika katak iha Reuniaun Konsellu Estadu, membro sira fó opiniaun de’it la iha votasaun ida, tanba tuir Konstituisaun artigu 90 númeru 1, katak Konsellu Estadu ne’e orgaun konsulta, la’os orgaun deliberativu,” hateten Arão liu husi konferénsia imprensa iha nia gabinete PN, Dili Segunda 11 Maiu 2020 oras lorokraik.
Politika nain ne’ebé mai husi partidu CNRT ne’e esplika, tuir rejimentu Konsellu Estad u nian ne’e konfidensial, tanba ne’e labele iha membru Konsellu Estadu ida depois reuniaun fó nia rezultadu ba públiku.
“Ha’u nia opiniaun iha reuniaun Konsellu Estadu deskreve iha ata. Se Deputadu sira iha asesu ba reuniaun konsellu Estadu nian, ida ne’e hatudu momós notasaun ba sigilo profissionais no segredu Estadu nian, husu ba deputadu ne’ebé divulga reuniaun konsellu Estadu nian tenke responsabiliza,” Arão afirma.
