DILI (TOP) – Deputadu hamutuk nain 36 husi bankada parlamentar tolu (3) iha Parlamentu Nasionál (PN) “falla” ona iha faze dahuluk hodi “hadau tiha” ka halo destituisaun ba Prezidente Parlamentu Nasionál (PPN), tanba durasaun tempu ne’e liu tiha ona, maibé hahu hatama tan ona destituisaun foun iha loron Segunda, 11 Maiu 2020.
Pedidu destituisaun dahuluk ne’ebé hatama husi bankada parlamentar tolu, bankada PLP, Khunto no FRETILIN iha loron 5 Maiu liuba no vise xefe bankada PLP, Francisco de Vasconcelos promete, sei “obriga” halo destituisaun ba Prezidente Parlamentu Nasionál (PPN), Arão Noe de Jesus da Costa Amaral, maibé pedidu destituisaun ne’e rejeitadu ona iha loron Segunda, 11 Maiu liuba, no iha loron ne’e kedas liu minutu balun de’it, bankada tolu ne’e mós hatama hikas pedidiu destituisaun daruak nian iha oras tuku 6 lorokraik.
Hafoin hatama pedidu destituisaun dahuluk, deputadu Francisco de Vasconcelos katak iha loron Kuarta 13 Maiu 2020, deputadu nain 36 ne’e sei “obriga” halo destituisaun ba PPN, maibé ikus mai la akontese ida, tanba molok halo destituisaun PPN, Arão Noe rejeita ona, no sira mós hatama tan pedidu destituisaun foun.
“Aban vise sira iha para ami hare nia andamentu para oinsa vise sira bele asegura. Abain bainrua, Kuarta, Kuarta ita bele tama ona ba mosaun destituisaun nian, ita ba plenaria,” deputadu Francisco de Vansconcelos hateten ba jornalista sira iha Parlamentu Nasionál foin lalais.
Interpretasaun Rejimentu Parlamentu Nasionál entre deputadu Francisco ho Vise Prezidente Parlamentu Nasionál, deputadu Luis Roberto “tatidik malu” hela, tanba deputadu Francisco dehan ne’e obrigatóriumente, maibé deputadu Luis dehan la’e tenke hetan autorizasaun husi PPN mak vise sira bele troka.
Deputadu Luis esplika, se bazeia ba rejimentu Parlamentu Nasionál iha artigu 17 katak ne’e kompetensia Prezidente Parlamentu Nasionál ninian.
“Nia mak bele fó despaisu legal ruma, fó informasaun ruma ba vise nain-rua para atu asume kna’ar Prezidente nia fatin, ne’e bazeia ba artigu 22 rejimentu Parlamentu Nasionál nian,” esplika Luis Roberto.
“Maibé, kuandu laiha despaisu legal ruma husi Prezidente Parlamentu Nasionál, ami vise Prezidente mós ami labele halo buat ida,” esplika Luis Roberto husi partidu Khunto ne’e.
Iha parte seluk, vise xefe bankada partidu CNRT, deputadu Patrocino dos Reis Fernandes fiar katak vise Prezidente Parlamentu nain-rua sei la halo, tanba rejimentu no konstituisaun mós la fó dalan atu halo.
“Se akontese destituisaun ne’e asalta poder,” hateten deputadu Patrocino ba jornalista sira iha PN, Tersa 12 Maiu 2020.
Nunee mós xefe bankada CNRT, deputadu Duarte Nunes katak bele halo destituisaun, maibé tenke liu husi dalan legal.
Notisia Relevante: “Hadau” kargu PPN tenke liu dalan legal
Entretantu, Arão Noe de Jesus da Costa Amaral kontinua husu ba Prezidente Repúblika (PR), Francisco Guterres Lú Olo hodi disolve Parlamentu Nasionál, tanba konstituisaun RDTL mak ezije.
Nia fó hanoin fali katak, PN la aprova Orsamentu Jeral Estadu (OJE) iha loron 17 Janeiru liuba, mak tuir konstituisaun RDTL artigu 86 alinea F katak bainhira liu ona loron 60, Prezidente Repúblika tenke disolve ona PN.
Notisia relevante: Arão husu PR Lú Olo disolve PN
Maske nune’e, iha ona planu seluk katak asaun “obriga” hodi halo destituisaun ne’e sei akontese iha Segunda semana oin.
