DILI (TOP) – Prezid ente Parlamentu Nasionál (PPN), Arão Noe de Jesus Amaral kontinua husu ba Prezidente Repúblika (PR), Francisco Guterres Lú Olo hodi disolve Parlamentu Nasionál, tanba konstituisaun RDTL mak ezije.
Nia fó hanoin fali katak, PN la aprova Orsamentu Jeral Estadu (OJE) iha loron 17 Janeiru liuba, mak tuir konstituisaun RDTL artigu 86 alinea F katak bainhira liu ona loron 60, Prezidente Repúblika tenke disolve ona PN.
“Parlamentu Nasionál hein hela desijaun ne’e husi Prezidente Repúblika. Tanba ne’e agora la’ós tempu atu halo destituisaun ba Prezidente Parlamentu Nasionál no meja V Lejislatura nian, hateten PPN Arão liu husi konferénsia ba imprensa iha Parlamentu Nasionál, Dili Segunda 11 Maiu 2020.
Nia rejeita trava atividade Parlamentu Nasionál durante ne’e, tanba reuniaun lider bankada sira antes ne’e desidi ona katak se laiha ordem do dia mak laiha plenária.
“Ida ne’e ha’u kumpri no halo hala’o hela, la’ós tanba hakarak impata serbisu Parlamentu Nasionál nian,” nia esplika.
“Tanba ne’e akuzasaun ne’e laloos, no ha’u la simu justifikasaun iha karta pedidu ida ne’ebé hateten katak ha’u mak trava atividade Parlamentu nian hodi kria krize institusional,” afirma Arão.
Nia esplika semana kotuk laiha ajenda ba ordem do dia hodi bele halo plenária Segunda no Tersa.
“Ne’e ha’u hala’o tuir de’it desijaun lider bankada nian, iha fulan Marsu. Tanba ne’e mak laiha konvokatóriu,” nia esplika.
Entretantu, proponente sira ne’ebé asina destituisaun ne’e akuza Prezidente PN Arão katak nia mak trava aprovasaun Lei Anti Korupsaun nian, maibé Arão klarifika katak, akuzasaun ne’e la loos ida, no akuzasaun falsu, tanba lei ne’e baixa iha Komisaun A ne’ebé iha deputadu nain 4 husi partidu FRETILIN, nain 3 husi CNRT no nain ida husi PLP.
Nia konsidera pedidu destituisaun ne’e laiha klareza, maske nune’e nia sei kontinua estudate destituisaun ne’e ho tempu laiha rohan.
“Ha’u sei estuda lai,” esplika Arão.
Nia hatutan, iha mandatu Prezidente PN, Aniceto Guterres nian deputadu sira hato’o desitutisaun ba nia, maibé laiha resposta to’o fulan 6 hodi ikus mai fó dalan ba Prezidente Repúblika disolve tiha PN no anunsia eleisaun antisipada iha Maiu 2018.
