Bano vizita konstrusaun edifisiu administrasaun RAEOA

Prezidente Autoridade RAEOA, Arsenio Paixão Bano serbisu ba loron daruak nian vizita ona konstrusaun edifisiu administrasaun Oe-Kusi Ambeno ne'ebé seidauk hotu hela de'it. Foto The Oe-Kusi Post/Abilio Elo Nini.

SANTA ROSA (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA), no Zona Espesial ba Ekonomia Sosial Merkadu (ZEESM), Arsenio Paixão Bano vizita ona konstrusaun edifisiu administrasaun ne’ebé seidauk hotu hela de’it.

"Loron daruak ha’u tama serbisu rona no hare, buka hatene serbisu uluk ha’u sei iha autoridade tenki buka tuir hatene ne’e mak ohin ba hare edifisiu administrasaun foin mak 35%, tanba ne’e ita fo semangat ba sira para halo nafatin,” hateten Prezidente Autoridade RAEOA, Arsenio Paixão Bano ba The Oe-Kusi Post hafoin remata nia vizita ikus iha klinika São Damião iha bairu Numbei Oe-Kusi Ambeno, Tersa 23 Juñu 2020.

Bano esplika, nia vizita ba fatin sira ne’e importante, tanba edifisiu administrasaun ne’e sei sai ijemplu ida tanba, edifisiu ne’e sei akomoda funsionáriu besik 500.

“Ha’u la fiar tinan ida ne’e hotu, maibé tenki hotu, tanba edifisiu ne’eba mós atu moderniza ita nia servisu ba povu Oe-Kusi, karik ema boot ida mai vizita diresaun ruma nia la persiza halai tun-sa’e atu buka direktur sira,” esplika Bano.

Nia promete semana oin, autoridade sei hasoru tékniku sira atu deskuti kona ba problema atrazamentu ba obra ne’e.

“Ha’u marka ona tempu semana oin hanesan ne’e, ha’u sei hasoru tékniku sira atu deskuti emperminodes problema balun, tanba nia difikuldade ne’e seidauk to’o. Normalmente, konstrusaun hanesan presija téknika maka’as parese ohin ita ba hare eskritóriu ne’e nia akavamentu ne’e sei difisil liutan, tanba finishing ida ne’e presija kualidade di’ak, entaun sasan sira iha ne’eba kuandu la’o neneik tanba ita eziji kualidade mós maka’as sei obra ne’e foin mak 35%, pagamentu mós só 35%,” nia esplika.

Prezidente Autoridade ne’e mós komenta, kompañia la viola kontratu, tanba governu kontinua fó extensaun ba kontratu nian hodi finaliza ho kualidade tuir padraun internasional nian.

“Ita labele dehan kompañia viola ona kontratu, tanba bainhira laiha amenda kontratu ne’e oin seluk, maibé ita sempre amenda. Esplikasaun husi tékniku sira ita labele termina kontru nune’e de’it, maibé ita tenki estuda para nia sei bele halo i fó nafatin oportunidade tenki halo, maibé importante ita tenki fiskaliza” nia esplika.

 

Entretantu, tuir kontratu dahuluk katak projetu ne’e tenke remata ona iha tinan 2018, infelizmente to’o oras ne’e seidauk hotu hela de’it. Projetu ne’e hahu iha loron 1 Fevereiru 2017 ho valor kontratu US$ 10,900,033, 37 ba durasaun fulan 18, maibé nia durasaun ne’e liu tiha ona, no extende tan kontratu ba fulan tolu ona mós seidauk bele hotu to’o ohin loron.

Notisia relevante: Kuadru avisu edifisiu administrasaun RAEOA monta fali ona

The Oe-Kusi Post observa serbisu Prezidente Autoridade tama ba loron daruak nian mak vizita ona konstrusaun edifisiu administrasaun, vizita klinika fuan, no remata iha klinika São Damião iha Numbei.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE