Kuadru avisu edifisiu administrasaun RAEOA monta fali ona

Kuadru avizu ba kontrusaun edifisiu administrasaun RAEOA monta fali ona. Foto The Oe-Kusi Post/Abilio Elo Nini.

AMBENO (TOP) – Kuadru avizu ba projetu konstrusaun edifisiu foun administrasaun Rejiaun Administrativa Espesial oe-Kusi Ambeno (RAEOA) oras ne’e monta fali ona hafoin monu, tanba kazu husi natureza.

Antes ne’e, kuadru avizu ne’e tomak hela, maibé hafoin The Oe-Kusi Post hatun notisia ida kona-ba Konstrusaun Edifisiu Administrasaun RAEOA Abandonadu iha loron 1 Abril liuba, no iha loron tuir mai kedas akontese Kuadru Avizu Administrasaun RAEOA Nakles Fahe Rua, tuir fali Kuadro Avizu Edifisiu Administrasaun RAEOA Laiha Ona, no ikus mai oras ne’e monta fali ona.

Kona-ba kestaun ne’e, Diretor Obras Publika RAEOA, Candido dos Reis Amaral konsidera kuadro avizu nakles dalarua tutuir malu tanba asidenti natureza.

“Ida ne’e tanba asidenti natureza, ha’u hatene katak maluk sira serbisu nafatin kona-ba problema kestaun kompañia nian, ha’u hanoin ha’u hanesan diretor ha’u akompaña nafatin loron ba loron,” hateten diretor Candido ba The Oe-Kusi Post iha portu Iwao Kita Hara, Mahata, Oe-Kusi Ambeno Sesta 19 Juñu 2020.

Nia hatutan, agora dadauk extende tan kontratu ba projetu ne’e ho rajaun surtu moras virus corona (Covid-19) iha Timor-Leste.

“Extende ba tolu ba kompañia SAMHEE ne’ebé agora dadauk serbisu halo hela, edifisiu administrasaun RAEOA no ZEESM ba futuru, extende ne’e tanba ne’e kestaun global ba pandemia Covid-19, difisil ba kompañia atu mobiliza material ne’ebé mai husi nasaun afeitadu sira entaun susar atu sira lori mai. Tanba ne’e mak extende tan fó tan tempu ba sira ita hein katak bainhira pandemia ne’e ultrapasa nune’e bele fó ona biban ba kompañia atu mobiliza material ne’ebé mak nia sei halo hotu serbisu ne’e,” nia esplika.

Entretantu, tuir kontratu dahuluk katak projetu ne’e tenke remata ona iha tinan 2018, infelizmente to’o oras ne’e seidauk hotu hela de’it. Projetu ne’e hahu iha loron 1 Fevereiru 2017 ho valor kontratu US$ 10,900,033, 37 ba durasaun fulan 18, maibé nia durasaun ne’e liu tiha ona, no extende tan kontratu ba fulan tolu ona mós seidauk bele hotu to’o ohin loron.

Antes ne’e diretor Candido argumenta rajaun atraza, tanba material ba konstrusaun ne’e haruka husi rai-liur no presija han tempu naruk itoan mak foin to’o mai rai-laran, maibé oras ne’e dehan fali atrazu, tanba impkatu husi moras Covid-19 ne’ebé afeta mundu tomak inklui Timor-Leste.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE