Kuadru Avizu Administrasaun RAEOA Nakles Fahe Rua

Kuadru avizu ba konstrusaun edifisiu administrasaun RAEOA ne'ebé ema le'es tiha ona. Foto Oe-Kusi Post/Abilio Elo Nini.

Oekusipost.com Ambeno – Progresu konstrusaun edifisiu administrasaun Rejiaun Administrativu Espesial Oe-Kusi Ambeno (RAEOA) foin mak to’o pur sentu 40 (40%), maibé ema balun hahu le’es tiha ona informasaun sira iha kuadru avizu ne'e, nu’udar dalan ida atu “desvia” tiha nia durasaun kontratu. 

Situasaun ne’e akontese hafoin The Oe-Kusi Post públika notisia ida ho títulu Konstrusaun Edifisiu Administrasaun RAEOA "Abandonadu"iha loron 1 Abril 2020, no iha loron 2 Abril 2020, kuadru avizu ne’e ema le’es tiha ona, le’es fahe klaran tiha. 

Iha loron 13 Marsu 2020, jornalista Oe-Kusi Post halo intervista ho diretór obras públiku RAEOA, Candido dos Reis Amaral kona-bá konstrusaun edifisiu ne’e iha oras tuku 3:40 lorokraik. No iha loron Sábadu 14 Marsu 2020 oras tuku 4:00 lorokraik, ba halo observasaun iha konstrusaun ne’e no hakerek sai tiha informasaun sira iha kuadru avizu kona-bá durasaun kontratu no valor kontratu, inflizmente informasaun importante hirak ne’e ohin loron ema labele asesu ona, tanba ema balun le’es tiha ona.

Prosesu konstrusaun ba edifisiu administrasaun Rejiaun Administrativu Oe-Kusi Ambeno (RAEOA) ne’ebé tuir loloos tenke hotu iha fulan Agostu tinan 2018, maibé to’o ohin loron sai "abandonadu" tiha, tanba tama ona fulan Abril tinan 2020 mós projetu ne’e foin mak to’o pur sentu 40 (40%).

Durante ne’e kuaje ema barak fiar katak empreza sira husi China sempre halo projetu fiziku ho lalais no kumpri durasaun kontratu, maibé persepsaun ida ne’e la akontese iha RAEOA. Faktu hatudu, hafoin empreza SAMHEE Construction, Co. Ltd husi Repúblika Popular China manan projetu ne’e no halo akordu kontratu ho autoridade RAEOA iha Fevereiru 2017 katak projetu konstrusaun ne’e tenke hotu iha Agostu 2018, infelizmente realidade halai oin seluk tiha. Projetu ne'e s_eidauk hotu to’o ohin loron.



Kuadru avizu ba konstrusaun edifisiu administrasaun RAEOA ne'ebé ema le'es tiha ona. Foto Oe-Kusi Post/Abilio Elo Nini.
Kuadru avizu ba konstrusaun edifisiu administrasaun RAEOA ne'ebé ema le'es tiha ona. Foto Oe-Kusi Post/Abilio Elo Nini.

Nune’e, Diretór Obras Públiku RAEOA, Candido Dos Reis Amaral justifika, projetu ne’e la konsege priense durasaun kontratu ne’ebé iha, tanba maioria material husi konstrusaun ne’e mai husi rai liur ne’ebé kontribui maka’as hodi halo projetu ne’e labele hotu tuir tempu kontratu. Valor osan ba projetu ne’e hamutuk $ 190, 900,99.37,

“Edifisiu ne’e agora la’o hela. Progresu ne’ebé mak identifikadu husi parte fizikal to’o agora 40%,” hatete diretór Candido ba Oe-Kusi Post iha Oe-Kusi Ambeno foin lalais.

Diretor Candido mós rekoñese projetu ne’e lakonsege hotu tuir durasaun kontratu nian, maibé ho diplomasia katak serbisu balun besik atu hotu ona hanesan estrutura edifisiu nian hotu ona, no ida ne’ebé seidauk hotu mak dezeñu iha laran (interior design) inklui serbisu ki’ik oan balun tan.

“Ha’u hakarak dehan de’it, katak nia progresu ne’ebé mak atraza ne’e tanba deliberasaun material sira (delivery of materials) husi liur ne’e mak atraza kona-bá serbisu balun ne’ebé mak kompañia to’o agora seidauk aprezenta ba parte fiskal sira. Maibé, ita hein katak serbisu ne’e sei hotu lalais iha tempu badak,” promete diretór Candido. 

Nia esplika funsaun husi edisiu ne’e sei uja ba konsentrasaun serbisu administrasaun RAEOA nian. 

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE