Oekusipost.com Ambeno – Prosesu konstrusaun ba edifisiu administrasaun Rejiaun Administrativu Oe-Kusi Ambeno (RAEOA) ne’ebé tuir loloos tenke hotu iha fulan Agostu tinan 2018, maibé to’o ohin loron sai "abandonadu" tiha, tanba tama ona fulan Abril tinan 2020 mós projetu ne’e foin mak to’o pur sentu 40 (40%).
Durante ne’e kuaje ema barak fiar katak empreza sira husi China sempre halo projetu fiziku ho lalais no kumpri durasaun kontratu, maibé persepsaun ida ne’e la akontese iha RAEOA. Faktu hatudu, hafoin empreza SAMHEE Construction, Co. Ltd husi Repúblika Popular China manan projetu ne’e no halo akordu kontratu ho autoridade RAEOA iha Fevereiru 2017 katak projetu konstrusaun ne’e tenke hotu iha Agostu 2018, infelizmente realidade halai oin seluk tiha. Projetu ne'e s eidauk hotu to’o ohin loron.
Nune’e, Diretór Obras Públiku RAEOA, Candido Dos Reis Amaral justifika, projetu ne’e la konsege priense durasaun kontratu ne’ebé iha, tanba maioria material husi konstrusaun ne’e mai husi rai liur ne’ebé kontribui maka’as hodi halo projetu ne’e labele hotu tuir tempu kontratu. Valor osan ba projetu ne’e hamutuk $ 190, 900,99.37,
“Edifisiu ne’e agora la’o hela. Progresu ne’ebé mak identifikadu husi parte fizikal to’o agora 40%,” hatete diretór Candido ba Oe-Kusi Post iha Oe-Kusi Ambeno foin lalais.
Diretor Candido mós rekoñese projetu ne’e lakonsege hotu tuir durasaun kontratu nian, maibé ho diplomasia katak serbisu balun besik atu hotu ona hanesan estrutura edifisiu nian hotu ona, no ida ne’ebé seidauk hotu mak dezeñu iha laran (interior design) inklui serbisu ki’ik oan balun tan.
“Ha’u hakarak dehan de’it, katak nia progresu ne’ebé mak atraza ne’e tanba deliberasaun material sira (delivery of materials) husi liur ne’e mak atraza kona-bá serbisu balun ne’ebé mak kompañia to’o agora seidauk aprezenta ba parte fiskal sira. Maibé, ita hein katak serbisu ne’e sei hotu lalais iha tempu badak,” promete diretór Candido.
Nia esplika funsaun husi edisiu ne’e sei uja ba konsentrasaun serbisu administrasaun RAEOA nian.
Futuru edifisiu administrasaun RAEOA nia dezeñu mak ida ne'e. Durasaun kontratu tenke remata iha Agostu 2018, infelizmente konstrusaun fiziku to'o ohin loron foin mak to'o pur sentu 40.
Iha parte seluk, Ambeno oan ida, Arnol Suni fó esperansa katak hafoin konstrusaun edisiu ne’e hotu sei fasilita liutan funsionáriu públiku iha RAEOA konsentra iha fatin ida de’it, ne’e katak odamatan administrasaun ne’e ida de’it ona.
