DILI (TOP) – Autoridade Rejiaun Administrativa Espesial Oe-kui Ambeno (RAEOA) apela ba povu Oe-kusi Ambeno tomak atu kumpre nafatin regra distansia sosial, tanba iha nasaun viziñu Kupang-Indonezia oras ne’e númeru kazu suspeitu positivu sa’e ba nain 59.
Diretor Saude interinu RAEOA, Luis de Jesus Neno katak, durante ne’e serbisu saúde rejional Ambeno kontinua tau atensaun maka’as, tanba nasaun viziñu oras ne’e númeri kazu positivu Covid-19 aumenta.
Eis enfermeiru sentru saúde postu Oe-Silo ne’e apela ba povo tomak iha Oe-Kusi Ambeno tuur hakmatek, tanba Ambeno nu’udar rai-ketan ida ne’ebé husi teritóriu Indonézia nian, no besik loos NTT.
“Ita hatene katak oras ne’e NTT nia kazu sa’e ba nain 59, ida mate tiha ona. Tanba ne’e mak ita nia povu sira tenke tuur hakmatek,” hatete Luis de Jesus Neno ba jornalista sira iha Timor Plaza, Dili Domingu 17 Maiu 2020.
Aleinde ne’e mós, Neno hatete, daudaun ne’e ro ahi Sukses no Berlin Nakroma hala’o ona operasaun ba-mai Dili-Oe-Kusi Ambeno ne’e semana ida dala ida, maibé pasajeiru sira tenke kumpri nafatin distansia sosial ne’e.
Tuir nia katak, servisu saude iha RAEOA durante ne’e la’o kapas tebes, tanba iha prosesu hala’o atividade prevensaun ne’e identifika fatin tolu mak sai hanesan ba fatin kuarentena nian.
“Ami rekolla iha fatin kuarentena durante ne’e hamutuk ema nain 179 no sira ne’ebé mak kumpri ona sira nia dever durante loron 14 iha fatin kuarentena hamutuk nain 173 mak fila ona ba sira nia hela fatin, agora sei iha nain 6,” nia esplika.
