MASIN – LIDUN (TOP) – Estudante hamutuk nain 36 hetan ona apoiu umanitáriu hanesan nesesidade báziku husi ekipa gabinete autoridade Rejiaun Administrativu Espesial Oe-Kusi Ambeno (RAEOA).
Xefe gabinete interinu Autoridade RAEOA, Agustinho Caet hateten, ekipa gabinete autoridade RAEOA kontinua identifika estudante Ambeno oan sira ne’ebé hela iha kapital nasaun hodi fó umanitáriu ba sira, tanba durante ne’e sira susar tebes atu asesu ba ai-han.
“Ita hahu iha semana hirak liu ba, hahu apoiu ita nia estudante sira, tanba ita hatene katak estudante hasoru situasaun difisil ida ne’e,” hatete Caet ba jornalista sira iha Timor Plaza, Domingu 17 Maiu 2020.
Tuir eis xefe gabinete MNEK ne’e katak, estudante Ambeno oan sira iha Dili, balun hetan ona apoiu husi autoridade RAEOA, no balun seidauk, maibé ekipa RAEOA kontinua hein lista estudante sira ne’ebé seidauk hetan nune’e bele fó responde.
“Ohin ita ba apoiu ita nia estudante sira iha área Masin-Lidu, Tasi-Tolu sira hamutuk ema nain 36 ne’ebé sira hala’o sira nia estudu iha Dili,” Caet esplika.
Nia dehan, entre estudante nain 36 ne’e, balu hala’o estudu iha eskola sekundária no balun iha universidade, entaun sira merese atu hetan apoiu nesesidade báziku tanba iha situasaun Estadu emerjénsia ne’e sira la ba Oe-Kusi Ambeno.
Entretantu, reprezentante estudante Ambeno iha Masin-Lidun, Eusebio Pui agradese tebes ba ekipa autoridade RAEOA, tanba apoiu ona foos hamutuk saku 26.
“Ha’u agradese ba ita nia autoridade RAEOA tanba ohin bele hakat mai iha ami nia fatin hodi apoiu nesesidade báziku mai ami estudante,” hateten Eusebio.
