SIKLULI (TOP) – Membru polisia nain 6 husi Unidade Polisia Fronteira (UPF) iha Rejiaun Administrativu Espesial Oe-Kusi Ambeno (RAEOA) hetan ona promosaun deziva. Membru UPF hirak ne’e husi kompañia Charly.
Membru UPF sira ne’e mak hanesan inspetor Jaimito Hei nu’udar komandante Kompañia Charly promove ba Inspetor Xefe, inklui nian membru nain 5 durante ne’e ho deviza ajente promove ba ajente prinsipal mak hanesan, Gulhermino Fereira, João Barto, Mario H. Soares, Nicolau Amancio, Silveiro de Deus Maia. Seremónia promosaun deviza ne’e hala’o iha kuartel Jeral UPF iha bairo Sikluli, suku Costa, postu administrativu Pante Makasar iha loron kuarta 20 Maiu 2020.
Hafoin remata seremonia promosaun deviza ne’e, reprezentante komando jeral PNTL segundu komandante UPF, superintendente João Sanches Pires katak, tuir loloos promosaun deviza ne’e hala’o iha loron 27 Marsu liuba, maibé lakonsege tanba situasaun Estadu emerjénsia ne’ebé presija tebes UPF sira nia esforsu hodi kontrola área liña fronteira sira iha Oe-Kusi Ambeno.
Entretantu tuir komandante kompañia Charly, Inspektur xefe Jamito Hei sente orgullu tebes no konsidera promosaun deviza ne’e nu’udar responsabilidade boot ida tan hodi asegura ho área fronteira sira iha rai-ketan Oe-Kusi Ambeno.
“Ida ne’e ha’u sente orgullu tebes tanba, sira valoriza nafatin ami nia sakrifisiu ne’ebé durante ne’e ami hala’o iha terenu,” hateten komandante Jaimito ba The Oe-Kusi Post (TOP) iha Sikluli, Oe-Kusi Ambeno, Kuarta 20 Maiu 2020.
Nia hatutan, durante ne’e iha membru UPF nain 90 mak koloka ba iha fronteira sira hanesan Sakato suku nipani to’o fronteira Usapi Ba’af Citrana suku Bene-Ufe (Ben Uf).
