AMBENO (TOP) - Autoridade Rejiaun Administrativa Espesiál Oé-Cusse Ambeno (RAEOA) hahu serbisu hamutuk ona ho Merie Stopes Internasional iha Timor Leste (MSITL) atu hala’o advokasia no protesaun ba feto no labarik feto sira iha Oé-Cusse Ambeno.
Serbisu hamutuk entre parte rua ne’e liu husi, asina MoU ida iha seremonia komemorasaun loron mundiál feto ho tema, Ksolok Loron Mundial Feto, “Ita Hotu Asegura Direitu, Justisa Asaun ba Feto no Labarik Feto Hotu”, iha Salaun Konvensaun 1 de Maiu Palaban.
Prezidente Autoridade Rejiaun Administrativa Espesial Oé-cusse Ambeno (RAEOA), Régio Servantes Roméia da Cruz Salu hateten, tane feto Timor no labarik feto ne’e importante tebes, ho protesaun no seguru, no fó direitu atu feto sira mós bele sai lider iha Timor-Leste.
“Liu-liu iha interativu, ha’u hakarak fó importansia ba feto lideransa iha dezenvolvimentu potensia lideransa ba RAEOA nian. Ohin mós ita asina MoU ho MSITL, hare'e husi parte advokasia, hodi fó seguransa, protesaun ba feto no labarik feto, no ita nia povu, tanba ita hatene katak, wainhira ami estrutura ida ne’e hahú ami nia mandatu, Primeiru Ministru nu'udar entidade tutelár fó hanoin ba ami katak, tau de’it iha ulun ba povu no o nia rai,” esplika Prezidente Autoridade RAEOA.
Prezidente Autoridade RAEOA mós konsidera, MoU ne’e sai hanesan multi konsiderasaun, hodi defende, promove no fó protesaun ba povu, liu-liu feto sira nia potensia atu bele tama iha vida polítika no lideransa ekonómiku.
“MoU ne’ebé Autoridade RAEOA asina ho MSITL ne’e, la’os haree de’it ba saúde, maibé liga mós ho asuntu hodi proteje direitu feto no juventude sira, nu'udar potensia kontinuador nasaun ne’e nian,” Prezidente Autoridade RAEOA afirma.
Iha fatin hanesan, Country Director Marie Stopes Timor-Leste, Maria Amelia N. Barreto, agradese ba kooperasaun ne’ebé estabele ona ho Autoridade RAEOA.
“Kooperasaun ida ne’e, atu formaliza de’it ona serbisu ne’ebé durante ne’e ita halo, tanba MSITL serbisu hamutuk ho RAEOA dezde tinan 2016, no ita iha tópiku ne’ebé termina ona iha tinan 2025, maibé agora ita halo tuir fali akordu ida, ho konteudu intersektoral,” katak Country Director Marie Stopes Timor-Leste, Maria Amelia N. Barreto.
Nia dehan, ba futuru, MSITL sei serbisu hamutuk ho igualdade jéneru, setór edukasaun, setór agrikultura no setór desportivu iha RAEOA, tanba área desportiva ne’e, akumula juventude barak, no MSITL mai atu haforsa sistema ne’ebé RAEOA iha ona, ho lideransa husi Prezidente Autoridade RAEOA atuál no estrutura tomak.
