OE-SILO (TOP) - Instituisaun FALINTIL-Forsa Defeza Timor-Leste (F-FDTL) hahu ona vizita fatin instalasaun ba postu foun komponente terrestre tolu iha Posto Oé-Silo, Pássabe no Nítibe iha Rejiaun Administrativu Espesiál Oe-Kusi Ambeno (RAEOA), ho objetivu atu hakbesik liu-tan serbisu forsa-defeza nian ba komunidade sira iha área fronteira rai-maran nian.
Hafoin estrutura RAEOA simu delegasaun Komponente Terrestre F-FDTL iha Gabinete Prezidente Autoridade RAEOA iha kapitál Ambeno, delegasaun ne’e hakat kedas ba hare fatin balun iha áreador edifisiu Posto-Administrativo Antigo Oé-Silo nian.
The Oe-Kusi Post (TOP) observa, ekipa delegasaun F-FDTL ne’ebé akompaña husi estrutura RAEOA nian hala’o vizita ba fatin atu monta posto foun iha Oé-Silo ne’e akontese iha loron Tersa, 07 Abril 2026.
Tuir planu katak, instalasaun postu sira ne’e sei kontribui atu hametin liu-tan prezensa F-FDTL liliu Komponente Terrestre nian hodi hadi’a kapasidade resposta seguransa iha rejiaun sira ne’ebé dook husi komunidade sira nia hela fatin.
Planu monta posto foun ne’e mós nu’udar hakat ida atu hakbesik liu-tan F-FDTL sira hodi moris hamutuk ho komunidade sira no mós atu konkretiza filosofia “povo mak bee, FALINTIL mak ikan” katak, F-FDTL ne’e moris no eziste husi povu. Se povu laiha, F-FDTL mós laiha.
“Ohin ami mai hasoru autoridade RAEOA atu hetan apoiu kona-ba rai, ba instalasaun postu F-FDTL foun iha Oé-Silo, Pássabe no Nítibe,” Xefe Estadu Maiór Forsa Armada Timor-Leste, Brigadeiru Jenerál José da Costa Soares “Trix” hateten ba jornalista sira.
BriJen Trix konsidera, enkontru ne’e ho estrutura autoridade RAEOA hatudu sinál kolaborasaun di’ak ho Komandu F-FDTL liu husi indika ona fatin ne’ebé apropriadu ba konstrusaun postu sira iha tempu badak.
Kona-ba kestaun fatin ka lokalizasaun ba posto foun Komponente Terrestre nian, Diretór Diresaun Rejionál Terras no Propriedade, José Ase Neno Colo hateten, sei kontinua koordena ho autoridade lokál sira iha Posto Administrativo Oé-Silo, Pássabe, Nítibe no Pante Makasar, hodi identifika no prepara rai ba projetu ne’e.
“Terras no Propriedade sei fasilita atividade Estadu nian, inklui nesesidade F-FDTL, tanba prezensa forsa importante atu garante defeza soberanu área fronteira,” nia esplika.
Durante ne’e, F-FDTL estabelese tiha ona Komponente Terrestre ida iha Sikone, Suku Lalisuk, no Komponente Navál ida iha Oé-Ba’u, Suku Costa.
