AMBENO (TOP) - Prezidente Autoridade ba Rejiaun Administrativu Espesial Oe-Kusi Ambeno (RAEOA), Régio Serventes Roméia da Cruz Salu husu ba povo Ambeno liliu ba membru estrutura RAEOA nian tenke koopera no fó apoiu tomak ba PA RAEOA Interinu atual Diretór Nasionál Apoia Administrasaun Suku, Celestinho Martinho Marques hodi bele remata no finaliza ninia mandato interinu durante loron 40 ne’e ho di’ak iha rai-ketan Ambeno.
Régio Serventes Roméia da Cruz Salu hasoru malu tiha ona ho PA RAEOA Interinu atual Diretór Nasionál Apoia Administrasaun Suku, Celestinho Martinho Marques iha gabinete PA RAEOA nian hodi troka hanoin ba malu atu oinsa bele organiza didi’ak estrutura definitivu RAEOA nian hafoin loron 40 remata.
Régio da Cruz Salu esplika, ema hotu-hotu liliu ba Ambeno nia oan sira tenke prepara didi’ak prosesu ho kualidade estrutura definitivu administrasaun governativa ida ba RAEOA, tanba
antes ne’e iha loron 26 Marsu 2026, prosesu ne’e hahu tiha ona hamutuk ho governu sentrál liu-liu hamutuk ho CFP, MAE no MdF desde loron 7 Setembru 2025.
”Prosesu tékniku ida ne’e sei kontinua ho CFP, MAE ho MdF to'o estrutura foun definitivu RAEOA reorganizadu pose no kontinua hala’o kna’ar,” Prezidente Autoridade ba Rejiaun Administrativu Espesial Oe-Kusi Ambeno (RAEOA), Régio Serventes Roméia da Cruz Salu esplika liu husi deklarasaun ofisial ida ne’ebé The Oe-Kusi Post (TOP) asesu husi Pájina Ofisial RAEOA nian iha loron Domingu dader, 12 Abril 2026.
Dezenvolve ita nia Oé-cusse Ambeno sai dunik rejiaun administrasaun espesial ida ne'ebé éfikaz, institusaun - administrativamente dinamizadora iha planamentu no jestaun públiku nian, nune’e promove povu no potensia ekonómia sira ne'ebé iha ba bem estár no rezilensia ba povo Ambeno, Timor-Leste.
Assuntu relevante: Karta domin ba Querido Tomás do Rosário Cabral: keta viola demais povo Ambeno nia direitu
”Nu’udar Prezidente da Autoridade RAEOA, ha’u fó nafatin konfiansa no koragen ba Maun alin Atoni Oé-cusse Ambeno sira, liu-liu Membrus Autoridade RAEOA sira, Funsionárius Públiku Permanente sira iha RAEOA, primeiru, atu sai no hamrik iha filheira dahuluk parte ne'ebé komprende no tane prosesu administrasaun governativu iha periodu ida ne’e,” Régio da Cruz Salu afirma.
”Nu’udar Presidente da Autoridade, RAEOA husu ba ha’u nia membru Autoridade sira atu fó apoiu tomak ba Presidente Autoridade, RAEOA - Interinu iha prosesu saida de’it iha periodu ida ne'e. Faze ida ne’e tenke remata ho kualidade, imparsial no ho rezultadu ida ne'ebé administrativamente sei hatuur ita nia RAEOA iha potensialidade dezenvolvimentu lokál ida ne'ebé importante, promove nafatin povu nia ekonómia no unidade. Ita Oé-cusse Ambeno oan ne'ebé atualmente lidera hela RAEOA, sei rai hela légadu administrasaun ukun ida ne’ebé di’ak ba Atoni - lider sira seluk tuir mai”.
Nia mós husu ba ekipa preparativu ba Planu Estratéjiku ba Dezenvolvimentu Regional (PEDR), RAEOA - 2⁰, 2027 - 2031 atu komtinua koordena ho Diretór Rejionál Planeamento no Aprovizionamento, Augusto Jorge de Fátima Efi ho Coordenador ZEEDOA, Erkulanu de Sousa atu remata faze inisial no krusial prosesu tékniku dezenvolvimentu PEDR - RAEOA, 2⁰ nian.
”Ha’u rasik, maske iha ha’u nia ausênsia rekuperasaun saúde nian, maibé hasoru malun tiha ona ho Exselênsia Presidente Autoridade, RAEOA - Interinu atu fó nafatin ha’u nia konfiansa no apoiu tomak atu lidera RAEOA nia prosesu importante iha periodu ida ne'e”.
