AMBENO (TOP) - Prezidente Autoridade Rejiaun Administrativa Espesiál Oé-cusse-Ambeno (RAEOA) Régio Servantes Roméia da Cruz Salu, iha loron Segunda 20 fulan April, retoma hikas nia funsaun nu’udar Prezidente Autoridade Rejiaun Administrativa Espesiál Oé-cusse Ambeno (RAEOA), hafoin rekuperadu husi kondisaun saúde durante semana tolu, hahú iha loron 27 fulan Marsu to’o 20 Abríl 2026.
“Ha’u hakarak hato’o agradesimentu ba Ministru Administrasaun Estatál (MAE) ho ekipa no tane as ha’u-nia maun-alin sira, hamutuk ho membru Autoridade RAEOA tomak, halo serbisu importante durante impedimentu ha’u-nia saúde rasik,” Prezidente Autoridade RAEOA hatete ba jornalista sira iha salaun konvensaun 1 de Maiu Palaban Oé-cusse Ambeno, Segunda, 20 Abril 2024.
Governo sentrál halo ona promesa katak, reuniaun Konsellu Ministru sira nian iha loron Kuarta, 23 Abril 2026 sei foti ona desijaun ba estrutura definitivu estrutura RAEOA nian, no Prezidente Autoridade RAEOA atual sei kontinua ninia mandatu to’o tinan ida ne’e nia rohan.
Nia haktuir, situasaun ne’e akontese, tanba serbisu intensivu tebes husi Governu Sentrál ho povu Oé-cusse.
“Uluk, ha’u hateten kedas, katak impedimentu saúde ha’u-nian, labele hapara funsionamentu no devér ita hotu, nune’e funsionamentu administrativa Governu nian la’o nafatin", Prezidente Autoridade RAEOA afirma.
Ministro da Administração Estatal no Prezidente Autoridade RAEOA interinu iha konfiansa katak, “ha’u fizikámente bele hala’o ona serbisu no ohin ha’u retoma fila-fali ha’u-nia kna’ar, hanesan Prezidente Autoridade,” Katak Prezidente Autoridade RAEOA Régio Serventes Roméia da Cruz Salu.
Prezidente Autoridase RAEOA esklarese, iha loron Tersa-feira loron 21 fulan Abríl ne'e, membrus Autoridade RAEOA no Prezidente Autoridade RAEOA interinu, sei hala’o enkontru ofisiál ida, atu kontinua hare'e serbisu saida de’it mak tenki halo.
Tanbá bainhira estrutura definitivu akontese no prosesu hari'i podér lokál ne’e la’o, RAEOA presiza nafatin akompañamentu, nune’e funsionamentu administrativu podér lokál ne’e bele la’o ho di’ak.
“Dala ida tan, ha’u haraik-an ba kolega sira-ne’ebé serbisu maka’as, serbisu ho fuan, hala’o nafatin funsionamentu administrasaun ba Governu la’o nafatin ho di’ak,” dehan Prezidente Autoridade RAEOA Régio Serventes Roméia da Cruz Salu.
