Ambeno Oan Nain 44 Hela Iha Sentru Akollimentu

Hotel Fitun Lima iha Oel-Upun ne'ebé abandonadu, no oras ne'e nakfilak ba Sentru Akollimentu ba Ambeno oan sira hodi labele hada'et moris Coronavirus Disease 2019 (CorVid-19) iha Oe-Kusi Ambeno. Foto Media Gabinete PA ba RAEOA.

Oekusipost.com Ambeno – Estudante no komunidade hamutuk 44 mak oras ne’e kumpri hela loron 14 iha Sentru Akollimentu ne’ebé prepara ona husi autoridade Rejiaun Administrativu Espesial Oe-Kusi Ambeno (RAEOA).

Tuir dadus The Oe-Kusi Post katak, Ambeno oan hirak ne’e fahe ba fatin rua, Hotel Fitun Lima iha Oel-Upun no Hotel-Lifau iha Oel-Ba’u (Oe-Ba’u). Husi nain 44 ne’e iha estudante nain 17 ne’ebé hala’o estudu iha provinsia balun iha Indonézia hanesan iha Kupang, Surabaya, Jogja, Malang no Bali, sira tama iha Sentru Akollimentu Hotel Fitun Lima, no nain 27 iha Hotel-Lifau.

Diretór Saúde Interinu RAEOA, Marcos Seo hateten, autoridade kontinua halo esforsu atu asegura Ambeno oan sira ne’ebé foin fila husi rai liur.

“Ami prepara fatin rua, Hotel-Lifau no Hotel Fitu Lima inklui rezidensia eis Sekretáriu Rejionál sira iha Fulolo nu’udar fatin rezervadu,” hatete diretór Seo ba Oe-Kusi Post iha nia serbisu fatin, Oe-Kusi Ambeno, Segunda 30 Marsu 2020.

Nia hatutan, estudante balun livre ona husi Sentru Akollimentu hafoin halo identifikasaun husi parte médiku sira, no balun la’ós mai husi nasaun afetadu ba moras Coronavirus Disease 2019 (CorVid-19).

“Ba segundu nian mak Sentru Akolimentu iha Hotel-Lifau hamutuk nain 17 estudante hotu foin fila husi Indonézia no dadauk nee iha nain 2 tuir hela dalan iha Oe-Silo tama mai tan,” Seo esplika.

Nia hatutan, estudante hirak ne’e sei hela iha Sentru Akollimentu durante loron 14, no karik laiha sintoma ruma kona-bá CorVid mak sei liberta sira ida-idak ba hela nia uma, maibé se rezultadu teste médiku mak identifika ema ruma hatudu sintomas mak sei koloka iha Klinika Internasional ba Fuan hodi izola a’an molok transporta ba Dili hodi hetan tratamentu.

Diretór Saúde Interinu RAEOA, Marcos Seo akompaña nia pessoal médiku nain rua halo hela tratamentu ba estudante feto ida iha Hotel-Lifau. Foto Media Gabinete PA ba RAEOA.
Diretór Saúde Interinu RAEOA, Marcos Seo akompaña nia pessoal médiku nain rua halo hela tratamentu ba estudante feto ida iha Hotel-Lifau. Foto Media Gabinete PA ba RAEOA.

Kona-bá pessoal médiku iha Ambeno hamutuk nain 11 mak oras ne’e akompaña hela estudante no komunidade sira iha hotel rua ne’e durante oras 24 nia laran.

“Sira ne’e alin estudante sira balu estuda iha Kupang, Jogja, Java ne’ebé mak tama iha fatin akollimentu ne’e durante loron 14 mak la iha sintoma, entrega ba familia,” Seo esplika.

Entretantu, antes ne’e Prezidente Autoridade (PA) ba RAEOA, José Luis Guterres (Lugu) husu ba komunidade sira atu labele pániku ba pandemia COVID-19, tanba komisaun instaladora sei sosializa COVID-19 atu komunidade komprende no oinsá prevene sedu hodi labele afeta. Kona-ba Sentru Akollimentu, Autoridade RAEOA aloka ona finanseiru hodi apoiu ita-nia komunidade ne'ebé sei hela iha sentru tolu refere.

"Ha'u mós apresia inisiativa husi autoridade lokál, lia na'in sira no komisaun atu koordena hamutuk oinsá atu hala'o serimónia rituál ida hodi husu ba ita-nia beala sira hodi hadook COVID-19. Inisiativa ne'e di'ak tebes no Autoridade sei apoiu másimu hodi realiza serimónia ne’e,” hateten Lugu. 

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE