Embaixador foun Amérika to’o ona TL

DILI (TOP) – Embaixador foun Estadu Unidus Amérika (EUA) ba Timor-Leste C. Kevin Blackstone to’o ona Timor-Leste hodi troka embaixadora Kathleen Fitzpartrick ne’ebé nia misaun remata ona iha fulan Novembru 2020.

Tuir informasaun ne’ebé The Oe-Kusi Post (TOP) asesu husi pájina ofisial U.S. Embassy - Dili, Timor-Leste katak, embaixador ne’e to’o ona rai-laran iha loron 4 Fevereiru 2021, no oras ne’e iha hela periodu kuarentena.

“Nia hein ho laran ksolok atu lakleur tan hahu ninia atividade diplomátika no hasoru komunidade Timor oan sira!”.

Iha loron 6 Janeiru 2021, Kevin Blackstone simu posse hodi servi hanesan Embaixador foun ba Timor-Leste.

Iha nia diskursu katak Timor-Leste nu’udar nasaun demokrasia foun liu durante tinan 20 nia-laran ona, sai tia ona ezemplu di’ak ba seluk iha nia fortalesimentu instituisaun demokrátiku sira, liberdade imprensa, no ninia rezilénsia ba dezafiu sira.

“Ha’u espera bele halo saida maka ha’u bele halo atu hametin liutan relasaun entre Timor oan no Amerikanu sira.”

Kevin Blackstone, membru kareira ida husi Servisu Superiór Negósiu Estranjeiru, Klase Ministru-Konselleiru, konfirmadu ona nu’udar Embaixadór Estadus Unidus Amérika ba Repúblika Demokrátika Timor-Leste iha loron 22 fulan Dezembru 2020.

Embaixadór Blackstone halao ona nia knaar hanesan Diretór Ezekutivu iha Gabinete Asuntus Ázia Leste no Pasífiku hahú husi fulan Jullu 2017 to’o Setembru 2020.

Hanesan Ofisiál Servisu Estranjeiru dezde 1991, Embaixadór Blackstone antes ne’e hala’o kna’ar nu’udar Ministru-Konselleiru ba Jestaun Embaixada Estadus Unidus iha Kairo, Ejiptu, no Konselleiru Jestaun ba Estadus Unidus nia Embaixada sira iha Bangkok, Tailandia no Nova Delí, Índia.

Husi tinan 2009-2010, Embaixadór Blackstone sai hanesan Líder Ekipa ba Estadus Unidus nia Ekipa Rekonstrusaun Provinsiál iha Wasit Irake. Antes ne’e, nia serbi ona iha misoens konsulár no jestaun iha Nijéria, Uganda, Gabon, Itália, Kanada, Índia, no Ejiptu.

Nia mós hala’o ona knaar nu’udar Ofisiál Programa iha Departamentu Estadu nia Gabinete Populasaun, Refujiadus no Migrasaun, inklui tinan ida diriji Gabinete nia Sentru Prosesamentu iha Washington hodi simu refujiadu sira husi antiga Uniaun Soviétika.

Blackstone hasai Lisensiatura iha Universidade Virjinia no Mestradu Administrasaun Públika husi Eskola Maxwell, Universidade Syracuse. Nia no ninia espoza Alexandra nu’udar inanaman ba oan adultu nain rua. 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE