DILI (TOP) – Primeiru-Ministru, Kay Rala Xanana Gusmão no Primeiru-Ministru Portugál, António Costa diskute akordu kooperasaun estrateziku ne’ebé rai rua sei estabelese iha tinan 2024 too 2028.
“Ami hala’o ona reniaun di’ak no agradese tebes ba Primeiru-Ministru António Costa, hakarak hateten katak ne’e nu’udar vizita ida espesiál tebes, tanba iha inisiu mandatu ha’u nia governasaun, iha ne’e Primeiru-Ministru António Costa ko’alia kona-ba planu kooperasaun tinan 2024-2028, ba oin ita sei nafatin iha kontaktu hodi asina akordu sira ne’ebé sei tau iha planu prioridade, loos duni katak amizade sempre kontinua hodi nune’e povu Timor-Leste sente ukun rasik-an ne’e iha ninia valór,” PM Xanana hateten liu husi konferensia ba imprensa sira iha Palásiu Governu, Dili Tersa 25 Jullu 2023.
Iha fatin hanesan, Primeiru-Ministru Portugál, António Costa informa vizita ne’e hodi hametin amizade no aproveita komprimenta PM Xanana Gusmão, ne’ebé asume kna’ar nu’udar Primeiru-Ministru IX Governu Konstitusionál ne’ebé simu pose hosi Prezidente Repúblika, José Ramos-Horta iha loron 01 Jullu 2023.
“Ha’u agradese tebes hala’o vizita mai Timor-Leste, no ohin mai hala’o reniaun ho Primeiru-Ministru Xanana Gusmão, ne’e hanesan oportunidade ida hodi mai hasoru malu. Ho Primeiru-Ministru Xanana, nia nu’udar luta ba independénsia Timor-Leste nian. Vizita ne’e nu’udar momentu importante tanba ho governu foun ha’u mak nu’udar Primeiru-Ministru dahuluk mai vizita, tanba ne’e hakarak agradese ba Xanana fó oportunidade ba ha’u hodi inísiu formasaun Governu,” informa PM António.
Xefe Governu Português reforsa tan Portugál no Timor-Leste nu’udar nasaun maun alin iha istória barak maka hametin rai rua no povu nia amizade hodi buka apoia malu estabelese programa estrateziku iha tempu besik.
“Ami ko’alia mós kona-ba preparasaun programa estratréziku kooperasaun entre tinan 2024-2028, hodi korresponde ba prioridade sira Governu Timór nian, ne’ebé presiza implementa durante mandatu ne’e ba oin,” nia hateten.
Xefe Governu Portugál António Costa ho delegasaun membru governu to’o iha Palásiu Governu simu hosi Primeiru-Ministru, Xanana Gusmão akompaña hosi membru Governu sira, hafoin ne’e realiza kedas parada militár hodi fó ondra ba Xefe Governu Portugál, iha momentu ne’e ekipa toka Ino nasionál Portugál no Timor-Leste nian, hafoin ne’e Primeiru-Ministru António hala’o pasa revista ba formatura militár akompaña hosi Xanana nu’udar onra hosi simu bainka espeisál ne’e.
