DILI (TOP) – Bankada CNRT iha Parlamentu Nasionál (PN) husu ona ba meja Parlamentu atu troka lalais Expedito Dias Ximenes husi Konsellu Imprensa (KI), tanba nia nu’udar ona Sekretariu Estadu ba Komunikasaun Sosial (SEKOMS).
Expedito Dias Ximenes atual SEKOMS hili husi sesaun plenaria Parlamentu Nasionál iha loron 18 Janeiru 2021 hodi reprezenta Parlamentu Nasionál iha Konsellu Imprensa ba periodu tinan ha’at (4) husi 2021 to’o 2025, maibé nia kontinua hetan tan konfiansa husi partidu CNRT hodi okupa kargu SEKOMS iha governasaun atual, nune’e bankada CNRT husu ona atu buka fali ema foun ida hodi troka nia.
Deputada CNRT, Cedelizia Faria dos Santos hateten, Expedito Dias Ximenes sai ona membru governu, hanesan Sekretáriu Estadu ba Komunikasaun Sosiál (SEKOMS), tanba ne'e husu ba meja presija ajenda ona atu hili membru foun ida hodi troka.
"Ha'u atu husu ba meja Parlamentu Nasionál (PN) kona-ba asuntu membru Konselleiru ida husi ita nia Konsellu Imprensa atual Sekretáriu Estadu ba Komunikasaun Sosiál (SEKOMS), Expedito Dias Ximenes ne'ebé mak uluk nia reprezenta Parlamentu Nasionál iha Konsellu Imprensa. Tenke substitui lalais ona hodi labele fó impaktu ba Konsellu Imprensa bainhira foti desijaun ruma," deputada, Cedelizia foti kestaun ne'e iha sesaun plenaria Parlamentu Nasionál iha Dili, Segunda 14 Agustu 2023.
Deputada ne’e esplika, Konsellu Imprensa iha Konselleiru nain-lima, no kada enkontru entre nain-lima ne’e tenke kompletu mak foin foti desijaun. Oras ne’e iha de’it nain-ha’at ona.
"Tanba sira ne'e mak sira na'in lima maibé, agora iha ha’at (4) de'it, ha'u hanoin susar tebes ba KI, tanba ne'e ha'u hakarak fó hanoin Parlamentu tanba, ita mak iha dever atu nomeia ema foun entaun, iha direitu iha tempu badak bele mós nomeia ema ida bele substitui fila-fali Expedito," esplika deputada Cedelizia.
Hetan ba kestaun ne'e, Prezidénte Parlamentu Nasionál (PPN), Maria Fernanda Lay katak, substituisaun ba membru KI ne’e deside ona iha reuniaun líder bankada sira foti tiha ona, no hein de'it atu hato'o membru kandidatura foun atu bele halo votasaun.
"Atu troka membru Konsellu Imprensa iha líder bankada foti tiha ona, ami hein katak líder bankada sira bele hato'o ninia kandidatu atu bele inklui ita bele halo votasaun hodi repoin fila- fali vakatura husi sira ne'ebé sai molok mandatu remata," esplika PPN, Fernanda Lay.
Antes ne’e, Expedito Dias Ximenes katak, nia hato’o ona nia karta rezignasaun ba iha Parlamentu Nasionál, maibé to’o ohin loron Parlamentu rasik mak seidauk hili ema foun ruma ba Konsellu Imprensa.
“Agora ha'u hato'o tiha ona ha'u-nia karta rezignasaun ba Parlamentu atu hili fali ida atu troka ha'u, tanba ha'u ne'e reprezentante hosi Parlamentu Nasionál,” Expedito hateten foin lalais.
