DILI (TOP) – Molok tama ba loron restaurasaun independensia Timor-Leste ba dala 18, meja Parlamentu Nasionál baku fila tiha ona, no to'o ohin loron seidauk hadia.
Iha loron Tersa dadersan 19 Maiu 2020 oras tuku 9 resin, deputadu nain na’in-65 (Fretilin 23, CNRT 21, PLP 8, PD 5, KHUNTO 5, UDT/FM 2, no PUDD 1) haksesuk malu iha sala plenaria Parlamentu Nasionál hodi ikus mai rezulta meja PN baku fila.
Hafoin meza ne’e baku-fila, mosu reasaun maka’as entre deputadu sira husi CNRT kontra deputadu sira husi FRETILIN no PLP. Deputadu sira husi PD, UDT/FM no PUDD akompaña de’it no hamriik hodi observa husi dook de’it.
Nune’e, atua hadia fali meja ne’e, Arschebispo Metropolitana atual Bispo dioseze Dili, Don Vergilio do Carmo da Silva SDB, husu Politika nain sira buka tuir fukun husi meja Prezidente Parlamentu nian ne'ebe rahun, no husu mós ba deputadu sira hotu tenke rekonsilia ba malu mak foin bele hadia.
"Ha’u ka’er nafatin ha’u nia lia-fuan ne’ebé uluk ha’u dehan katak meja ne’e la’os rai lakan mak kona ka anin mak huu mak monu ne’e, iha tan kauza ida mak provoka rahun. Agora tenke buka tuir nia fukun ne’e iha ne’ebé, hadia tiha nia fukun ne’e mak tau di’ak fali meja ne’e," Don Virgílio hateten ba jornalista sira iha Rezidensia Episcopal iha Bidau, Lecidere, Dili Kuarta 01 Jullu 2020.
Bispo husi munisipiu Baukau ne’e katak, Prezidente Parlamentu Nasioná (PPN), Aniceto Guterres admite ona hodi hadia hikas meja ne’e, maibé sei armoniza uluk sira nia relasaun iha PN hodi rekoñese sira nia salan sira mak foin bele hadia.
"Ekipa husi Prezidente Parlamentu nian mós admite katak loos duni, sira agora koko atu hadia ka harmoniza fila-fali, tanba uluk ne’e kuandu ran manas ikus mai akontese buat sira ne’e. Hadia uluk relasaun atu nune’e tulun ema ida-idak liliu na’i deputadu sira bele rekoñese erru ne'ebé ita halo hodi hatun dignidade parlamentu nian," rekomenda Don Virgílio.
Nia hatutan, importante tebes deputadu sira hotu tenke rekonsilia ba malu ka hadia sira nia relasaun ba malu tenke di’ak molok hadia meja PN ne’e.
"Ita admite katak buat ne’e ita ema mak halo tenke rekoñese sala sira ne’e hodi nune’e fó fila-fali esperansa ka dignidade nasaun nian no Parlamentu Nasionál nian”.
Iha fatin hanesan, Prezidente Parlamentu Nasionál, Aniceto Guterres katak PN desidi ona loron fixu mak loron 30 Agostu hodi hadia meja ne’e.
