DILI (TOP) – Konselleiru Máximu Partidu Kmanek Haburas Unidade Nasionál Timor Oan (KHUNTO), José dos Santos 'Naimori' promete iha tinan 2018 katak molok membru governu sira simu posse sei ba halo uluk juramentu iha foho Ramelau hodi simu matak-malirin, no atu hases sira labele komete kazu korupsaun durante sira nia governasaun, maibé promesa ida ne’e seidauk realiza to’o ohin loron.
Promesa tinan 2018 maske seidauk realiza, maibé deputadu husi bankada KHUNTO, Luis Roberto kontinua promete tan ona katak, membru governu sira ne’ebé mai husi partidu KHUNTO sei ba jura duni iha foho Ramelau iha tempu badak nia laran, maibé nia data fixu ne’e lahatene loos bainhira.
Deputadu Luis dehan, rajaun tenke ba jura iha foho Ramelau atu hametin liutan kompromisiu partidu KHUNTO nian ne’ebé promete ba povu durante tempu kampaña eleitoral hahu husi tinan 2017 to’o 2018.
“Iha tempu badak nia laran ami sei tuur hamutuk hodi deside sa data mak atu ba juramentu iha Ramelau, juramentu ne’e para mai fali hala’o sira nia serbisu karik ho didi’ak ho justu, buat ne’ebé mak sira han bazeia ba sira nian, maibé buat ne’ebé povu nian ne’e povu nian, ne’e ami partidu KHUNTO nia hakarak,” hateten deputadu Luis ba jornalista sira iha Parlamentu Nasionál, Dili Kuarta 1 Jullu 2020.
Deputadu KHUNTO husi postu Venilale ne’e espera membru governu ne’ebé tama iha partidu KHUNTO inklui Prezidente partidu KHNUTO sei tuir hotu juramentu tanba bazeia ba komprimisiu partidu nian.
“Ha’u hanoin regra ne’e hatuur tiha ona, katak la iha membru governu ida husi partidu KHUNTO ne’ebé mak atu rejeita atu ba juramentu, no hotu-hotu sempre hakarak tanba iha ona komprimisiu,” nia esplika.
