Oekusipost.com Dili – Prezidente Repúblika (PR), Francisco Gurterres Lú Olo hato’o ona nia mensajen ba Prezidente Parlamentu Nasionál (PN), Arão Noe de Jesus Amaral atu renova periodu Estadu emerjénsia ba loron 30 tan.
Molok PR Lú Olo hato’o mensajen ne’e ba PN, ohin dadersan nia rona uluk opiniaun sira mai husi membru Konsellu Estadu nian no membru Konsellu Superior ba Defeza no Seguransa, ikus mai konsellu rua ne’e ho unaminidade rekomenda ba PR atu haruka karta ba PN hodi hanaruk tan Estadu emerjénsia ne’e ba loron 30, maibé sei hein aprovasaun deputadu sira liu husi plenaria Parlamentu Nasionál mak foin PR anunsia de’it.
"Detallu kona-ba Estadu emerjénsia ne'e hanesan nafatin ida uluk, no agora ne'e governu presija atu halo medidas ne'ebé di’ak liu, atu povu bele hatene loloos kona-ba Estadu emerjénsia no mós moras Corona Virus (COVID - 19). Intensaun atu hanaruk Estadu emerjénsia ne’e ho objetivu ida de’it, mak Estadu ho governu hadomi nia povu ida ne’e, hakarak atu salva povu ida ne’e husi moras no husi mate. Ida nee mak prinsipal liu, no ba detallu sei regula husi dekretu implementasaun ne’e husi governu. Konsellu rua ne’e rekomenda unanimidade ba Prezidente Repúblika, bele haruka karta atu husu estensaun ba Estadu emerjénsia," hateten Xefe Kaza Sivil Prezidénsia Repúblika, Francisco María de Vasconcelos ba jornalista sira iha Palásiu Prezidensial, Dili Kuarta 22 Abril 2020.
Estadu emerjénsia ne’ebé Prezidente Repúblika dekreta iha 27 marsu sei remata iha 26 abril 2020. Haree ba situasaun surtu COVID-19 iha Timor-Leste ho kazu konfirmadu hamutuk 23, no rekuperadu 1, Governu hato’o proposta estensaun estadu emerjénsia nu’udar dalan di’ak liu ba prevensaun no kombate moras a’at ne’e. Governu propoin estensaun estadu emerjénsia ba fulan ida tan, hahú husi 27 abril-26 maiu 2020, maibé sei hein desijaun husi Parlamentu Nasionál.
Pandemia COVID-19 iha Estadu Membru ASEAN ninian hada’et ema liu rihun 27 no ema mate liu rihun ida. Mundialmente, iha ema hamutuk rihin 168 ne’ebé mate no hadaet ba ema liu millaun 2.
Konsellu Estadu ne'ebé Marka prezensa iha reuniaun ne'e mak hanesan, Atual xefe Estadu, Francisco Guterres Lu Olo, eis Prezidente Repúblika Jose Ramos Horta, atual Prezidente Parlanentu Nasionál, Arão Noé Amaral, atuál Primeiru Ministru Taur Matan Ruak.
“Prezidente Repúblika hala'o kna’ar tuir Konstituisaun, no mós valor sira inklui direitu konstitusional ne’ebé oras ne’e sai preokupasaun, ho ninia responsavél masimu no loloos mak, responsabilidade nasaun nian atu fó serteza kona-ba uzu forsa ne’ebé sertu ne’ebé konsagra iha paragrafu g) husi artigu 85 Konstituisaun Repúblika Demokratika Timor-Leste, ha’u husu disponibilidade no interese Prezidente Parlamentu Nasionál iha ne’ebé, hanesan Prezidente Repúblika, ha’u husu autorizasaun atu renova deklarasaun Estadu Emerjénsia iha territóriu Nasionál, ba tempu loron 30, hahu husi oras tuku 00:00 loron 27 fulan abril no termina iha oras tuku 11:59 ( kalan), loron 26 fulan maiu 2020.
Antesipadamente ha’u hato’o obrigadu sem iha diskusaun ba iha momentu ida ne’e, favór simu, Prezidente Parlamentu Nasionál ha’u nia proposta nee,” konteudu karta PR ba PN ne’ebé Oe-Kusi Post asesu iha plata forma media sosial.
Informasaun balun ne’ebé Oe-Kusi Post asesu katak, tuir loloos karta ne’e kategoria segredu, maibé ikus mai naksobu sai iha dalan klaran. PR hato’o ona karta ne’e ba PN iha oras tuku lorokraik ohin.
