Oekusipost.com Dili – Prezidente Repúblika (PR), Francisco Guterres Lú Olo ohin halo reuniaun ho Konsellu Estadu no Konsellu Superior Dezefa no Seguransa atu rona sira nia hanoin kona-bá proposta governu nian ne’ebé husu atu hanaruk tan periodu Estadu emerjénsia, tanba númeru kazu positivu oras ne’e to’o ona nain 23 maske entre kazu pozitivu hirak ne’e iha nain rua de’it mak hatudu sintomás.
Koordenador Forsa Tarefa ba Prevensaun no Mitigasaun, dotor Sergio Lobo hateten, kona-bá tratamentu, ema balun fahe moras ne’e nia grau ne’e ba nivel tolu, maibé barak liu ema fahe ba nivel lima. Nivel ida mak asintomatiku. Virus ne’e bele iha ema nia isin, maibé la hatudu sintomas. Ida ne’e entre 50%-70%, virus iha hela sira nia isin, maibé la hatudu sira mear ka isin manas. Sira asintomatiku.
Nia hatutan, balun iha sintomas lijeirus, dalaruma inus been de’it, inus metin de’it. Nivel tuir mai mak moras moderadu. Ida ne’e dalaruma bele isin manas boot, dalaruma bele mear maka’as. No nivel ida fali mak nivel grave, ne’e hare hanesan sira ne’ebé dada iis mós susar. Ida ne’e mak presija oxijenu.
“Ita nia maluk sira agora iha izolamentu ne’e tuir dadus ikus liu ne’e, sira nain rua de’it mak iha sintomas. Sira seluk ne’e sintomas laiha, maibé sira tenke iha izolamentu nafatin,” hatete dotor Sergio liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Sábadu 18 Abril 2020.
Komunikadu ne'ebé fó sai husi Prezidénsia Repúblika iha loron Tersa 21 Abril 2020 katak, Estadu emerjénsia ne’ebé Prezidente Repúblika dekreta iha 27 marsu sei remata iha 26 abril 2020. Haree ba situasaun surtu COVID-19 iha Timor-Leste ho kazu konfirmadu hamutuk 23, no rekuperadu 1, Governu hato’o proposta estensaun estadu emerjénsia nu’udar dalan di’ak liu ba prevensaun no kombate moras at ne’e.
Governu propoin estensaun estadu emerjénsia ba fulan ida tan, hahú husi 27 abril-26 maiu 2020.
Governu hatama proposta estensaun estadu emerjénsia atu fó protesaun ba saúde públika iha Repúblika Demokrátika Timor-Leste. Tanba coronavirus nu’udar pandemia nune’e presiza medida preventiva lalais atu la hadaet moras at ne’e babeibeik no hamate ema barak.
Hafoin rona hanoin sira husi Konsellu Estadu no Konsellu Superior Defeza no Seguransa, Prezidente Repúblika sei foti desizasaun. Molok dekreta estadu emerjénsia, Prezidente Repúblika sei husu autorizasaun husi Parlamentu Nasionál. Bainhira Parlamentu Nasionál autoriza, Prezidente Repúblika sei dekreta estadu emerjénsia.
Prezidente Repúblika iha 27 marsu deklara estadu emerjénsia ho fundamentu hadook ema hotu-hotu ne’ebé hela iha Timor-Leste husi kalamidade públika ne’ebé mosu husi COVID-19. Deklarasaun estadu emerjénsia abranje territóriu nasionál tomak.
Pandemia COVID-19 iha Estadu Membru ASEAN ninian hadaet ema liu rihun 27 no ema mate liu rihun ida. Mundialmente, iha ema hamutuk rihin 168 ne’ebé mate no hadaet ba ema liu millaun 2.
Total dadus nasionál iha tersa horseik tuku 6 kalan hatudu, kazu suspeitu sei iha ema nain 361, ema hamutuk nain 80 mak sei hein hela rezultadu teste laboratóriu, kazu provavel iha nain 4, kazu positivu iha ema nain 23, kazu negativu hamutuk ema nain 254, no ida di’ak tiha ona.
