Oekusipost.com Dili – Sekretariu Estadu Komunikasaun Sosial (SEKOMS), Mericio Juvinal dos Reis "Akara" hateten, durante ne’e mosu informasaun falsu barak tebes, tanba ne’e governu sei kombate informasaun hirak ne’e durante periodu Estadu emerjénsia.
"Importante Media sira tenke hatudu kualidade no kredibilidade jornalizmu liuhosi informasaun ne'ebé mak públika," hatete Akara ba jornalista sira iha Gabinete SEKOMS iha Palásiu Governu, Tersa 21 Abril 2020.
Nia hatutan, esensial mós ema no entidade sira hotu atu fahe informasaun sira ho loloos no kredivel hodi kontra divulgasaun no sirkulasaun informasaun hoax sira. Dalan kontribuisaun atu kontra lia-falsu iha ne'ebé espalla iha plata forma media sosial mak hanesan, informasaun Falsu sira normalmente laiha fonte loloos.
"Evita asesu ba informasaun husi fontes ne'ebé la klaru no evita mós fahe tutan informasaun ne'ebé mai hosi fonte sira ne'ebé la klaru," esplika governante ne’e.
Nia husu ba media sira, liliu jornalista sira tenke badinas halo verifikasaun ba faktu sira mós molok públika notisia ruma ba públiku.
