COVID-19: Kazu Pozitivu Hamutuk Nain 17 Ona

Oekusipost.com Dili – Sentru Integradu ba Jestaun Krize fó sai tan rezultadu kazu positivu moras virus corona (COVID-19) iha loron Kinta 16 Abril 2020 katak, aumenta tan nain 10 husi Hotel-Katuas hodi hasa’e pasiente positivu oras ne’e nain 17 ona iha Timor-Leste. 

Dotora Odete da Silva Viegas hatete, kazu konfirmadu ohin loron hamutuk ema nain 18, no ida di’ak tiha ona. Positivu hamutuk nain 17, no sai husi kuarentena hamutuk nain 1339. 

Nia hatutan, sei iha ema hamutuk nain 567 mak oras ne’e hela iha kuarentena ne’ebé kompostu husi Dili iha nain 456, no husi munisipiu hamutuk nain 111. Auto-kuarentena iha Dili laiha ona, no iha nain 6 mak halo auto-kuarentena iha munisipiu sira. Iha mós ema hamutuk nain 1339 mak liu tiha ona loron 14 nia laran, ne’ebé husi Dili hamutuk nain 1122, no nain 217 husi munisipiu sira. Dadus atual ba moras COVID-19 iha Timor-Leste ba loron ohin mak suspeitu iha nain 229, provavel iha 4, negativu iha 195, hein rezultadu ema nain 12, konfirmadu nain 18. 

“Ba loron ohin ita iha aumenta kazu 10 positivu, tanba ne’e mak ita atraza itoan. Husi kazu konfirmadu 18 ne’e, ida mak rekoperadu. Portantu ita hatene kazu konfirmadu agora iha ema nain 17,” hatete dotora Odete liu husi konferensia imprensa iha Sala Situasaun Sentru Integradu ba Jestaun Krize iha Sentru Konvensaun Dili, Kinta 16 Abril 2020.

Notisia relevante: Kazu Positivu Hamutuk Nain 7 Ona  

“Ema nain 10 ne’ebé mak ohin iha nafatin mai husi Hotel-Katuas ka informasaun ne’ebé klean liu sei hato’o aban Sesta 17 Abril 2020, tanba rezultadu ne’ebé hato’o mai mós iha oras ikus nian,” dotora Odete afirma. 

Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. No iha loron Kuarta 15 Abril 2020, rezultadu teste hatudu timoroan nain 2 tan positivu ona.

Loron Kinta ohin 16 Abril 2020 rezista tan kazu pozitivu foun hamutuk nain 10 husi Hotel-Katuas. Nune’e, total kazu pozitivu iha loron ohin hamutuk ema nain 17 ona mesak Timoroan de’it.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE