Oekusipost.com Dili – Konselleiru Superiór Partidu Kmanek Haburas Unidade Timor Oan (KHUNTO), José dos Santos Naimori Bucar hateten, to’o oras ne’e seidauk asina plata forma ka akordu foun ruma ho partidu ruma iha rai-laran.
Informasaun balun ne’ebé espalla iha rai-laran katak, iha loron Domingu liuba partidu KHUNTO asina ona plata forma foun ho partidu politika balun hodi kontinua apoiu governu atual to’o remata, maib é Naimori deklara katak to’o oras ne’e nia lahatene buat ida.
“Ha’u seidauk asina akordu ruma. Domingo foin lalais ne’e ha’u nia loron boot tan, seidauk ida. Ha’u lahatene buat ida maun,” hatete Naimori via kontaktu telemovél ba Oe-Kusi Post, Tersa 14 Abril 2020.
Entretantu, bankada partidu KHUNTO iha Parlamentu Nasionál (PN) katak, KHUNTO fó apoiu ba Primeiru-Ministru, Taur Matan Ruak la’ós ba assuntu politika, maibé tanba moras virus corona (COVID-19) ne’ebé oras ne’e eziste ona iha rai-laran.
Reprezentante partidu KHUNTO iha PN, deputadu Luis Roberto hatete, kona-ba pedidu demisaun Primeiru Ministru retira ne'e la preve iha lei, maibé KHUNTO kumpri nafatin otientasaun primeiru ministru nian hodi hala'o nafatin serbisu atu prevene COVID-19.
"Ita hare ba situasaun agora ita tenke apoiu atu prevene moras ne'e, maibé se moras la iha ne'e ita ko'alia buat seluk, ne'ebé se ita ko'alia ba politika ne'e buat seluk mas ko'alia ba COVID-19 ami KHUNTO fó apoiu nafatin ba oitavu governu," hatete deputadu Luis ba jornalista sira iha PN, Tersa 14 Abril 2020.
“Kona-ba kestaun politika ne'e KHUNTO asina ona akta koligasaun foun ne'ebe lidera husi Kay Rala Xanana Gusmão. Ita hare konjuntura politika ne'e oitavu governu hala'o hela servisu, ne'ebé ita hotu tenke fó apoiu hodi responde ba situasaun emerjensia, maibé kaundu moras ne'e laiha ona entaun ita ko'alia fali ba buat seluk ona," esplika deputadu husi partidu KHUNTO ne’e hodi desmente no rejeita informasaun sira ne’ebé laloos espalla iha públiku.
"Ha'u dehan informasaun ne'e laloos tanba ami nu'udar membru superior partidu KHUNTO nian, ami seidauk hatene katak KHUNTO dada a’an husi koligasaun foun," deputadu Luis afirma.
Nia hatete, bainhira KHUNTO atu dada a’an husi koligasaun foun, entaun membru superior partidu KHUNTO tenke hatene, tanba ne'e públiku labele fiar informasaun ne'ebé espalla iha media sosial hanesan iha Facebook.
